The Washington Post nashri tahlilchilariga ko‘ra, Amerika Qo‘shma Shtatlari va Eron o‘rtasida yuzaga kelgan keskinlikdan hozircha eng katta foydani boshqa davlatlar ko‘rayotgan bo‘lishi mumkin. Xususan, bu vaziyat Rossiya va Xitoy uchun muayyan geosiyosiy imkoniyatlar yaratib berayotgani ta’kidlanmoqda.
Nashrda qayd etilishicha, Yaqin Sharqdagi vaziyat taranglashishi neft bozorida beqarorlikni kuchaytirishi mumkin. Neft yetkazib berishdagi ehtimoliy uzilishlar esa jahon bozorida energiya resurslari narxining oshishiga olib kelishi ehtimoldan xoli emas. Bunday holat, ayniqsa, neft eksport qiluvchi yirik davlatlardan biri bo‘lgan Rossiya uchun iqtisodiy jihatdan ma’lum darajada foyda keltirishi mumkin.
Ayni paytgacha Amerika Qo‘shma Shtatlarining asosiy harbiy va moliyaviy yordamlaridan biri Ukrainaga yo‘naltirilgan edi. Biroq Eron bilan bog‘liq yangi mojaro tufayli Vashington o‘z imkoniyatlari va resurslarini boshqa yo‘nalishlarga ham taqsimlashga majbur bo‘lishi mumkin.
Bu esa Ukrainaga ajratilayotgan harbiy yordam hajmining qisqarishi ehtimolini ham oshiradi. Bunday vaziyat esa, tabiiyki, Rossiya uchun muayyan strategik ustunlik keltirib chiqarishi mumkin.
So‘nggi yillarda Amerika tashqi siyosatida asosiy e’tibor Xitoyning iqtisodiy va harbiy salohiyati ortib borayotganiga qaratilayotgan edi. Biroq Eron bilan bog‘liq mojaro Vashingtonning diqqatini yana Yaqin Sharq mintaqasiga burib yuborishi mumkin.
Natijada Amerika Qo‘shma Shtatlarining strategik e’tibori bir vaqtning o‘zida ikki yo‘nalishga bo‘linib ketishi ehtimoli paydo bo‘ladi. Bu esa Xitoy uchun xalqaro maydonda o‘z ta’sir doirasini yanada kengaytirishga qo‘shimcha imkoniyat yaratishi mumkin.
“Zamin”ni Telegramʻda oʻqing!
