Eron AQSH bilan muzokaralarni qayta tiklash masalasida bir qator shartlarni ilgari surdi. Bu haqda Yaqin Sharqdagi voqealarni yorituvchi “Al Mayadeen” telekanali xabar tarqatdi.
Kanal ma’lumotiga ko‘ra, Tehron Vashington bilan har qanday muloqotni boshlashdan oldin muayyan kafolatlar talab qilmoqda. Xususan, Eron tomoni o‘z hududiga qarshi hech qanday tajovuzkor harakatlar amalga oshirilmasligi bo‘yicha rasmiy kafolat berilishini talab qilgan.
Shuningdek, Tehron tomoni ehtimoliy zararlar uchun tovon puli to‘lanishi masalasini ham kun tartibiga qo‘ygani aytilmoqda. Bu talablar muzokaralarni qayta boshlash uchun asosiy shartlardan biri sifatida ko‘rilmoqda.
Bundan tashqari, Eron o‘z yadroviy inshootlarida to‘liq yadroviy yoqilg‘i siklini amalga oshirish huquqi xalqaro darajada tan olinishini talab qilmoqda. Tehron bu masalani mamlakatning ilmiy va texnologik mustaqilligi bilan bog‘liq strategik huquq sifatida baholamoqda.
Tahlilchilarning fikricha, mazkur talablar AQSH va Eron o‘rtasidagi muzokaralar jarayonini yanada murakkablashtirishi mumkin. Shu bilan birga, ayrim kuzatuvchilar bu shartlar tomonlar o‘rtasidagi kelajak muloqotlari uchun yangi siyosiy savdolashuvlarga yo‘l ochishi ehtimolini ham istisno qilmayapti.
“Zamin”ni Telegramʻda oʻqing!
