O'zbekistonning Istanbuldagi Bosh konsulxonasi ma'lumotiga ko'ra, 22 yoshli O'zbekiston fuqarosi Sevdora Hakimjonova Izmirdagi o'zi yashagan ko'p qavatli uyning to'rtinchi qavatidan yiqilib tushgan.
Hozirda u davlat shifoxonasida davolanmoqda, shifokorlar uning ahvoli og'ir ekanini aytishmoqda. Konsulxona vaziyat nazoratga olinganini bildirdi.
E'lon qilingan ma'lumotlarga ko'ra, Hakimjonova Turkiya fuqarosi bilan diniy nikohdan o'tgan, biroq bu nikoh rasmiy ro'yxatdan o'tkazilmagan. Nikoh marosimi Namangan viloyatining Chust tumanida bo'lib o'tgani aytilmoqda.
Keyinchalik er-xotin Izmirga ko'chib o'tgan va kuyovning yaqin qarindoshlari bilan bir uyda yashab kelgan. Shuningdek, Hakimjonovaning eri ham uning o'zi kabi eshitish va nutqida nuqsonlarga ega ekani ma'lum qilindi.
Hodisa yuzasidan Turkiya huquqni muhofaza qiluvchi organlari jinoiy ish qo'zg'atdi. Tergovchilar voqeaning barcha tafsilotlarini aniqlash ustida ishlamoqda, to'plangan materiallar esa belgilangan tartibda prokuratura tomonidan ko'rib chiqilmoqda.
“Zamin”ni Telegramʻda oʻqing!
