Kecha, 16 aprel kuni Neapol shahrida sodir bo‘lgan kutilmagan va shov-shuvli jinoyat voqeasi butun Italiyada katta rezonans uyg‘otdi. Qurollangan guruh bank filialiga bostirib kirib, xodimlar va mijozlarni garovga olgani, so‘ngra yerosti yo‘llari orqali izsiz g‘oyib bo‘lgani ma’lum qilindi.
Dastlabki ma’lumotlarga ko‘ra, jinoyatchilar bankka kirgan zahoti vaziyatni o‘z nazoratiga olgan va jami 25 kishini garovda ushlab turgan. Voqea joyiga tezkor yetib kelgan politsiya binoni o‘rab olgan, hudud esa xavfsizlik sabab to‘liq yopilgan.
Taxminan ikki soat davom etgan muzokaralardan so‘ng garovdagilar ozod etilgan. Ba’zi odamlar kuchli stress holatiga tushgani sababli ularga tez tibbiy yordam ko‘rsatilgan, ammo jiddiy jarohatlar qayd etilmagan.
Maxsus xizmatlar binoga bostirib kirgan paytda esa jinoyatchilar allaqachon yo‘q bo‘lib ulgurgan edi. Keyingi tekshiruvlar ularning oldindan tayyorlangan maxfiy yo‘l — kanalizatsiya tizimiga ulanadigan tunnel orqali qochib ketganini aniqladi.
Guvohlarning aytishicha, bosqinchilar qurollangan bo‘lsa-da, garovdagilarga jiddiy zarar yetkazmagan, biroq ularni alohida xonaga qamab qo‘ygan. Bu esa reja oldindan puxta ishlab chiqilganini ko‘rsatmoqda.
Hodisa vaqtida favqulodda xizmatlar bank oynalarini sindirib, ichkarida qolgan fuqarolarni evakuatsiya qilgan. Minglab odamlar voqeani jonli efir orqali kuzatib borgan.
Hozirda politsiya kanalizatsiya va yerosti tarmoqlari bo‘ylab keng ko‘lamli qidiruv ishlarini davom ettirmoqda. Jinoyatchilar qanchalik miqdorda mablag‘ yoki qimmatbaho buyumlarni o‘marib ketgani esa hali aniqlanmagan.
Mazkur voqea Italiyada xavfsizlik tizimi va bank muhofazasi bo‘yicha jiddiy savollarni yana kun tartibiga olib chiqdi.
“Zamin”ni Telegramʻda oʻqing!
