Qozogʻistonlik 22 yoshli yigitga, Dubayda umrbod qamoq jazosi tayinlandi
Dubay sudi 22 yoshli Qozog‘iston fuqarosini bir qator og‘ir jinoyatlarda aybdor deb topib, unga umrbod qamoq jazosi va moliyaviy jarima tayinladi. BAAga ishlash uchun borgan yigitning yaqinlari u tuhmat qurboni bo‘lganini ta’kidlayotgan bir paytda, rasmiylar hozircha ekstraditsiya masalasi ko‘rib chiqilmayotganini ma’lum qildi. Hozirda mazkur ish bo‘yicha apellyatsiya jarayoni davom etmoqda va Qozog‘iston konsulligi mahkumga zarur huquqiy yordam ko‘rsatmoqda. Vaziyat Qozog‘iston Tashqi ishlar vazirligi tomonidan to‘liq nazoratga olingan.
Qozogʻistonlik yosh fuqaro Birlashgan Arab Amirliklarida ogʻir jazoga duch keldi. Qozogʻiston Tashqi ishlar vazirligi maʼlum qilishicha, 22 yoshli yigit Dubay sudi tomonidan umrbod ozodlikdan mahrum etilgan.
Rasmiy maʼlumotlarga koʻra, 2026 yil 18 mart kuni Dubayning birinchi instansiya sudi mazkur fuqaroni bir nechta jiddiy jinoyatlarda aybdor deb topgan va unga umrbod qamoq hamda moliyaviy jarima tayinlagan.
Yigitning yaqinlari uning 2024 yilda ishlash maqsadida Birlashgan Arab Amirliklariga ketganini, u yerda haydovchilik bilan shugʻullanganini bildirishmoqda. Ularning taʼkidlashicha, u aybsiz boʻlishi mumkin va ehtimol tuhmat qurboniga aylangan.
Mazkur ish yuzasidan Alibek Bakayev izoh berib, hozircha yigitni vataniga ekstraditsiya qilish masalasi koʻrib chiqilmayotganini aytdi. Uning soʻzlariga koʻra, hozirda apellyatsiya jarayoni davom etmoqda va barcha huquqiy bosqichlar yakuniga yetmaguncha bu haqda qaror qabul qilinmaydi.
Shuningdek, ish Birlashgan Arab Amirliklari qonunchiligi asosida koʻrib chiqilayotgani taʼkidlandi. Ayni paytda advokatlar hamda Qozogʻistonning Dubaydagi bosh konsulligi mazkur masala bilan shugʻullanmoqda.
Rasmiylarga koʻra, konsullik tomonidan fuqaroga zarur huquqiy va amaliy yordam koʻrsatilmoqda. Mazkur holat vazirlik nazoratida qolmoqda va barcha jarayonlar diqqat bilan kuzatib borilmoqda.
Izohlar 0
…