AQShda insonni hayratga soladigan voqea sodir boʻldi. AQShning Kaliforniya shtatida joylashgan Rancho-Kukamonga shahrida 49 yoshli ayol katta balandlikdan qulaganiga qaramasdan tirik qoldi.
Maʼlum qilinishicha, mazkur ayol ruhiy kasallikdan aziyat chekkan va oldindan jarohatlari ham boʻlgan. U uyidan chiqib ketib, uzoq vaqt qaytmaganidan soʻng oila aʼzolari xavotirga tushib, politsiyaga murojaat qilgan. Shundan soʻng qidiruv-qutqaruv ishlari zudlik bilan boshlab yuborildi.
Qidiruv jarayoniga maxsus tayyorlangan izquvar itlar va qutqaruv guruhlari jalb etildi. Murakkab va notekis hududda qariyb yarim kilometr masofani bosib oʻtgan qutqaruvchilar jarlik tomon harakatlanayotgan paytda ayolning yordam soʻrab chaqirgan ovozini eshitishgan. Ana shu holat uni topishda hal qiluvchi omil boʻlgan.
Aniqlanishicha, ayol qariyb 60 metr balandlikdagi tik jarlikdan qulagan. Bu kabi holatlarda tirik qolish ehtimoli juda past hisoblanadi. Shunga qaramasdan, u ogʻir jarohatlar olgan boʻlsa-da, hayotdan uzilmagan.
Qutqaruv xizmati xodimlari uni zudlik bilan vertolyot orqali xavfli hududdan olib chiqib, shifoxonaga yetkazishdi. Hozirda ayol shifokorlar nazorati ostida boʻlib, uning ahvoli barqaror deb baholanmoqda.
Bu voqea yana bir bor inson organizmi imkoniyatlari baʼzan tasavvurdan ham yuqori boʻlishini koʻrsatdi. Har qanday ogʻir vaziyatda ham umidni yoʻqotmaslik kerak — baʼzan moʻjiza ham roʻy beradi.
“Zamin”ni Telegramʻda oʻqing!
