Turkiyada bolalar va oʻsmirlarni internet muhitida himoya qilishga qaratilgan muhim qonun qabul qilindi. Yangi tartibga koʻra, 15 yoshdan kichik foydalanuvchilarga ijtimoiy tarmoqlardan foydalanish taqiqlanadi. Bu haqda xalqaro axborot agentligi Reuters xabar tarqatdi.
Qonun talablariga muvofiq, barcha onlayn platformalar foydalanuvchilarning yoshini aniqlash va tekshirish boʻyicha qatʼiy choralarni joriy etishi shart. Yaʼni, endilikda yoshni yashirish yoki notoʻgʻri maʼlumot kiritish orqali roʻyxatdan oʻtish ancha qiyinlashadi. Bu esa bolalarni zararli axborotdan muhofaza qilishga xizmat qilishi kutilmoqda.
Yangilik faqat ijtimoiy tarmoqlar bilan cheklanib qolmaydi. Oʻyin platformalari ham ushbu talablarga boʻysundiriladi. Ular oʻyinlarni yosh toifalariga qarab tasniflab, foydalanuvchilarni tegishli cheklovlar asosida kiritishlari lozim boʻladi. Bu orqali bolalar uchun mos kelmaydigan kontentdan himoya kuchaytiriladi.
Shuningdek, qonunga koʻra, foydalanuvchilar soni yuqori boʻlgan yirik platformalar Turkiya hududida rasmiy vakillik ochishi shart qilib belgilandi. Bu talab davlat nazoratini kuchaytirish va qonunbuzarlik holatlariga tezkor javob qaytarish imkonini beradi.
Avvalroq Yeni Şafak nashrida yozilishicha, mamlakatda bolalar va oʻsmirlar ishtirokidagi ayrim salbiy voqealardan soʻng hukumat qoʻshimcha choralar ustida ish boshlagan. Jumladan, bolalar uchun maxsus sim-kartalar joriy etish rejalashtirilmoqda. Bunday SIM-kartalar zararli va nomaqbul kontentni avtomatik ravishda cheklovchi maxsus filtrlar bilan taʼminlanadi.
Bundan tashqari, mutasaddilar VPN xizmatlarini cheklash, shuningdek 18 yoshgacha boʻlgan foydalanuvchilar uchun internetdan foydalanish tartibini yanada qattiqlashtirish masalasini ham koʻrib chiqmoqda.
Qisqacha aytganda, Turkiyada qabul qilingan ushbu qaror raqamli xavfsizlikni taʼminlash, ayniqsa yosh avlodni zararli axborotdan asrashga qaratilgan muhim qadam sifatida baholanmoqda. Bu kabi choralar kelajakda boshqa davlatlar uchun ham namuna boʻlishi ehtimoldan xoli emas.
“Zamin”ni Telegramʻda oʻqing!
