AQShning Sietl shahrida joylashgan mashhur “Saqich devori” dunyodagi eng noodatiy va qiziqarli joylardan biri hisoblanadi. Bir qarashda oddiy ko‘ringan bu devor aslida minglab odamlar tomonidan yaratilgan o‘ziga xos “san’at asari”dir.
Bu maskanning o‘ziga xosligi shundaki, tashrif buyuruvchilar chaynagan saqichlarini devorga yopishtirib ketishadi. Yillar davomida to‘plangan rang-barang saqichlar devorni g‘ayrioddiy ko‘rinishga keltirib, uni sayyohlar uchun diqqatga sazovor joyga aylantirgan.
Qiziq tomoni, bu an’ana 1990 yillarda teatr oldida navbat kutayotgan tomoshabinlar tomonidan boshlangan. Zerikkan odamlar saqichlarini devorga yopishtira boshlagan va vaqt o‘tishi bilan bu oddiy harakat o‘ziga xos urfga aylangan.
Mahalliy hokimiyat devorni bir necha bor tozalashga uringan. Hatto bir safar tonnalab saqich olib tashlangan. Ammo oradan ko‘p o‘tmay, devor yana avvalgi holatiga qaytgan — odamlar uni yana “bezashda” davom etgan.
Bugungi kunda “Saqich devori” nafaqat noodatiy san’at namunasi, balki sayyohlar uchun mashhur foto-maskan hamdir. Bu joy ko‘pchilikni hayratga soladi: kimdir uni ijod namunasi desa, boshqalar esa g‘alati odat sifatida baholaydi.
“Zamin”ni Telegramʻda oʻqing!
