Janubiy Koreyada vokzallar va gavjum ko‘chalarda sekin yuruvchilar uchun maxsus yo‘laklar sinov tariqasida joriy etilmoqda. Yangi tashabbus shaharlarda piyodalar harakatini yanada tartibga solishga qaratilgan.
Bu yo‘laklar, asosan, keksalar, chamadon bilan yurgan sayyohlar hamda bolalar aravachasi bilan harakatlanayotgan ota-onalar uchun mo‘ljallangan. Shu orqali ularga qulay va xavfsiz harakatlanish imkoniyati yaratiladi.
Mutaxassislarning ta’kidlashicha, bunday ajratish shoshayotgan piyodalar va sekin yuruvchilar oqimini bir-biridan ajratib, tirbandliklarni kamaytiradi. Ayniqsa, yirik shaharlarda bu kabi yechimlar transport va piyodalar harakatidagi noqulayliklarni ancha qisqartiradi.
Rasmiylar ushbu tizim odamlar o‘rtasidagi tushunmovchilik va asabiylikni kamaytirib, shahardagi umumiy stress darajasini pasaytirishga xizmat qiladi, deb hisoblamoqda. Agar sinov muvaffaqiyatli o‘tsa, bunday yo‘laklar boshqa hududlarda ham joriy qilinishi mumkin.
