Ukraina Mudofaa vazirligi: Urush boshidan buyon Rossiya taxminan 5,3 ming harbiysidan ayrildi

^{Foto: AFP}
Ukraina Mudofaa vazirligining vakili urush paytida Rossiya qurolli kuchlari orasidan qurbonlar taxminan 5300 kishini tashkil qilgani haqida xabar berdi. Hisobotda mazkur raqamlar yarador va asirlarni ham o‘z ichiga olish-olmasligi aytilmagan. Ushbu ma’lumotni mustaqil tasdiqlashning imkoni yo‘q, deb yozadi Meduza.

Vazirlik ma’lumotlar hali yangilanishi mumkinligini ta’kidladi. «Biz ma’lumotni faqat jang oxirida olishimiz mumkin, janglar esa juda uzoq davom etadi. Ma’lumotlar ertasi kuni, ba’zan indiniga kelib tushishi mumkin», — deyiladi xabarda.

Ukraina Mudofaa vazirligi o‘z yo‘qotishlari haqida ma’lumot bermagan.

Shuningdek, vazirlik vakilining aytishicha, Rossiya armiyasi to‘rt kunlik janglarda 29 ta samolyot, 29 vertolyot, 3 ta uchuvchisiz uchish apparati va 5 ta havo mudofaa tizimini yo‘qotgan. Bundan tashqari, 191 ta tank, 816 ta zirhli jangovar texnika, 291 ta mashina, 60 ta tank va 2 ta kemasidan ayrilgan.

Rossiya Mudofaa vazirligi Ukrainadagi «maxsus operatsiyasi» davomida qurbonlar soni haqida ma’lumot bermayapti.

«Tayga.info» nashrining huquq-tartibot idoralariga yaqin ikki manbasiga tayanib xabar berishicha, Ukrainadagi janglarda Rossiyaning Kemerovo viloyatidagi SOBR maxsus kuchlar otryadi boshlig‘i Konstantin Ogiy o‘ldirilgan.

«Biz pistirmaga tushdik. Kolonna o‘qqa tutildi. Yigitlar Krasnoyarsk va Novokuznetskdan. Biznikilardan 42 kishi, SOBR otryadidan ikki kishi halok bo‘ldi. Qancha omonchilarimiz o‘lgani hali noma’lum», — dedi manbalardan biri.

Uning so‘zlariga ko‘ra, maxsus kuchlar otryadi Belarus tomondan Ukraina bo‘ylab harakatlangan.

«Tayga.info»ning Kuzbass kuch tuzilmalaridagi yana bir manbasi ham gap o‘nlab qurbonlar haqida ketayotganini aytdi.

Rasmiy ravishda, OMON va SOBR bo‘ysunadigan Rossiya gvardiyasi va Mudofaa vazirligi Kuzbass xavfsizlik kuchlarining o‘limi haqidagi xabarga izoh bermadi.

Ukraina1, Rossiya1, Mudofaa1, Rossiya armiyasi1, Qurolli kuchlar1, Jangovar texnika1 Ukraina va Rossiya urushi “Zamin” yangiliklarini “Telegram”da kuzatib boring