21:28 / 01.03.2022

Urushning beshinchi kuni: Ukrainada tinch aholi orasida qurbonlar ortmoqda

^{Vitaliy Gnidyi / Reuters / Scanpix / LETA}
28 fevral kuni, urushning beshinchi kunida deyarli barcha yoʻnalishlarda Rossiya armiyasining yurishi sekinlashdi. Faqat Donbassda Ukraina armiyasi va oʻzini oʻzi mustaqil deb e'lon qilgan DXR va LXR respublikalari ayirmachilari oʻrtasidagi toʻqnashuvlar davom etmoqda.

Shu bilan birga bu kunda jiddiy oʻzgarishlar kuzatildi: Rossiya qoʻshinlari Xarkovdagi aholi turar joylari joylashgan kvartallarga artilleriya bilan halokatli zarbalar bera boshladi, bu erda 27 fevral kuni Rossiya razvedka guruhi qaqshatqich magʻlubiyatga uchrab, oʻnlab rus harbiylari asirga tushgandi. Shu vaqtgacha Rossiya qoʻshinlari aholi punktlariga ogʻir qurollar bilan kamdan kam hollarda zarba berayotgandi (katta ehtimol bilan Rossiya mudofaa vazirligining rejasi avvalboshdan tinch aholiga hujum qilmaslik boʻlgan).

Xarkovga «Grad» baravar oʻt ochish tizimlaridan zarba berilgan. Ukraina ichki ishlar vaziri maslahatchisi Anton Gerashchenkoning ma'lum qilishicha, ushbu hujum oqibatida oʻnlab qurbonlar va yuzlab jabrlanganlar bor.

Amerika harbiy tadqiqot institutining (CNA) Rossiya yoʻnalishi boʻyicha boʻlimi direktori Maykl Kofmanning hisoblashicha, Rossiya armiyasi hamisha oʻrganib kelgan ishini qilmagan: «Rossiya armiyasi, birinchi navbatda, artilleriyaga tayanadi, va shu vaqtgacha bu urushda undan faqat cheklangan tartibda foydalanildi». Uning fikricha, Rossiya mudofaa vazirligi «[haqiqiy] harbiy amaliyotsiz keng koʻlamli bostirib kirish orqali natijaga erishishga harakat qilgan».

Kofmanning aytishicha, bunday yondashuvdan voz kechilishi va artilleriya keng qoʻllanishi, jumladan aholi punktlarida, muqarrar. Uning fikricha, Xarkovga baravar oʻt ochish reaktiv tizimlari orqali oʻqqa tutilishi — Rossiya armiyasi «oʻrgatilganidek» urush qilishga tayyorligi alomatidir. Bu holda esa tinch aholi orasida qurbonlar soni oʻsishidan qochib qutulib boʻlmaydi.

Ikkinchi oʻzgarish — Xarkov ustida Rossiyaning Su-34 rusumli zamonaviy bombardimonchi samolyoti paydo boʻldi. Kofmanning yozishicha, Rossiya armiyasi asosan harbiylarni qoʻllab-quvvatlash uchun Su-25 shturmoviklari va operativ-taktik raketalardan foydalanayotgandi. Endi, katta ehtimol bilan, Rossiya qoʻmondonligi jang maydonida va ichkari hududlarda aviatsiyadan keng foydalanish uchun Ukraina havo hujumidan mudofaa tizimlari va Ukraina armiyasi harbiy-havo kuchlariga etarlicha zarar etkazilgan degan xulosaga kelgan.

Frontdagi vaziyat haqida qisqacha
«Meduza» joylardagi guvohlar tasvirga olib, ijtimoiy tarmoqlarga joylayotgan video va fotolar orqali frontdagi vaziyatni tahlil qildi.

28 fevral kuni olingan videolarga koʻra, Rossiya qoʻshinlari Kievni asta-sekinlik bilan shimoli-gʻarbdan qurshab olmoqda. Shahardan shimolda, 27 fevral kuni qaqshatqich janglar kechgan Bucha va Irpenda (Kiev markazidan 20 kilometr masofada) toʻqnashuvlar davom etdi. Rossiyaning boshqa boʻlinmasi Kievni shimoli-gʻarbdan oʻrab olishga harakat qilmoqda. Borodyank qishlogʻida janglar boʻlib oʻtdi, Rossiya texnikasi shu er orqali Kiev-Jitomir trassasiga oʻtishga harakat qilmoqda.
Xarkovda, Pentagondagi brifingda ma'lum qilinishicha, Rossiya harbiylari shaharni oʻrab olib, keyin «uni qamalga olish» harakatini qilmoqda. Pentagonning ma'lum qilishicha, Chernigov qamali boshlangan.
Xerson va Nikolaev hududlarida oʻzgarishlar yoʻq: rossiyalik harbiylar Odessaga hujum boshlash uchun kuch va zaxira toʻplamoqda. Mahalliy aholining soʻzlariga koʻra, 28 fevral kuni kechqurun rossiyaliklar kolonnalaridan biriga hujum amalga oshirilgan.
Zaporojedagi ruslar boʻlinmasi Energodarda Dnepr ustidan oʻtuvchi koʻprikka yaqinlashgan, ammo hali daryodan oʻtmagan. Shuningdek, bu guruh shaharga janubdan yaqinlashib kelgani xabar qilingan. Rossiya mudofaa vazirligi rejasiga koʻra, hozirda Zaporojeda oldinga siljiyotgan guruh Xarkov va Axtirkada ogʻir janglar olib borayotgan (hozircha butunlay muvaffaqiyatsiz) qoʻshinlar bilan birlashadi. Oʻshanda Ukrainaning Xarkov oblasti va Donbassdagi barcha jangovar qoʻshinlari qurshab olinadi.
Azov dengizi sohillarida ham yana bir qurshov amalga oshirilishi mumkin. Ammo Mariupolga gʻarbdan (Qrim) tomondan yurish shaharga 50 kilometr qolganida toʻxtab qolgan. Ruslar 27 fevral kuni egallagan Berdyanskda mahalliy aholi shahar kengashi binosi oldida miting uyushtirdi - bu erga Dogʻistondan Rosgvardiya jangchilari joylashtirilgan.
Mariupoldan sharqdagi rus qoʻshini va DXR kuchlari shaharning shimoli-sharqiga yaqinlashib, shaharni shimoldan uzib qoʻyishga harakat qilmoqda. Lugansk oblastida Rossiya armiyasi va LXR kuchlari Schaste posyolkasini egalladi. Ularning keyingi nishoni — Severodonetsk, undan keyin — Slavyansk va Kramatorsk.