Zelenskiy urushning davom etmasligiga umid qilayotgani haqida gapirdi

^{Foto: AP Photo}
Ukraina prezidenti Vladimir Zelenskiy mamlakatdagi qurolli harakatlar uzoq davom etmasligiga umid qilishini bildirdi. Bu haqda Reuters xabar bergan.

«Urushning uzoq davom etmasligiga ishongim keladi», — degan Ukraina davlat rahbari.

Zelenskiyning soʻzlariga koʻra, oʻt ochishni toʻxtatish haqidagi keng qamrovli muzokaralar Rossiya Ukraina shaharlariga zarba berishdan toʻxtatganidan keyin davom etadi. Shuningdek, u Kiev hamda Moskva oʻrtasidagi muzokaralarning birinchi raundi besamar yakunlanganini qayd etgan.

«Ukraina agar NATO eshiklarini Kiev uchun yopadigan boʻlsa, oʻz xavfsizligining huquqiy kafolatlarini talab qiladi», — deya ta'kidlagan Zelenskiy.

Zelenskiy alyans a'zolarini Rossiya aviatsiyasini toʻxtatish uchun Ukraina osmoni uzra parvozsiz hudud tashkil qilishga chaqirdi va bu NATOni Rossiya bilan nizoga aralashtirish emas, aksincha majburiy chora boʻlishini aytgan.

Avvalroq internetda Xarkovdagi Ozodlik maydoniga yoʻllangan raketa hujumining videolari tarqalgan, Zelenskiy ushbu hujumni ochiqdan ochiq terror deb atagandi.

24 fevral kuni Rossiya prezidenti Vladimir Putin Donbass aholisini himoya qilish, Ukrainani «demilitarizatsiya» va «denazifikatsiya qilish» uchun «maxsus harbiy operatsiya» boshlanganini e'lon qildi. Kreml gap «harbiy salohiyatni zararsizlantirish» va «Ukrainani natsistlardan tozalash» haqida ketayotganini tushuntirdi. Putinning bayonotidan keyin Ukraina shaharlari bir necha bor oʻqqa tutildi. Rossiya Mudofaa vazirligi bunga aloqadorligini rad etmoqda. “Zamin” yangiliklarini “Telegram”da kuzatib boring