Rossiya ilk marta urushda qancha qurbon berganini e'lon qildi

^{Foto: t.me/oleksiihoncharenko}
Ukrainadagi urushda Rossiyaning 498 nafar harbiysi halok boʻlgan. Bu haqda mamlakat Mudofaa vazirligi xabar bermoqda.
Rossiya ilk marta urushda qancha askar qurbon boʻlgani haqida ma'lum qilmoqda.

«Rossiyaning harbiy operatsiyasida Ukraina tomonidan 2 870 nafar odam halok boʻlgan. Rossiya tomonidan 498 nafar askar harbiy burchini bajarayotgan vaqtda halok boʻldi», deyilgan bayonotda.

Oʻz navbatida, RF Mudofaa vazirligi Ukrainaning yoʻqotishlari boʻyicha ham oʻz ma'lumotlarini taqdim etgan, unga koʻra, harbiy harakatlar boshlanganidan buyon ukrainalik harbiylar orasidagi qurbonlar soni 2870 nafardan oshgan, 3700 nafardan ortiq kishi yaralangan, 572 kishi asirga tushgan.

Taqqoslash uchun: Ukraina Bosh shtabi ma'lumotiga koʻra, 24 fevraldan 2 martga qadar boʻlgan muddatda rossiyaliklarning yoʻqotishlari halok boʻlganlar va yaralanganlar qoʻshilganda 5 840 nafarni tashkil etgan, 200 nafar atrofidagi kishi asirga tushgan.

Rossiya tomoniga koʻra, harbiy amaliyotlar vaqtida Ukrainaning 1533 ta hariy infratuzilma ob'ektiga, 54 ta boshqaruv punkti va harbiy aloqa tuzilmalariga, 39 ta havo hujumidan mudofaa komplekslariga, 52 ta radiolokatsiya stantsiyasiga zarba berilgan.

Shuningdek, Ukrainaning 47 ta harbiy samolyoti erda, 13 tasi havoda yoʻq qilingani, 484 ta tank va jangovar mashinalar, 63 ta raketa tuzilmalari, 217 ta dala artilleriyasi, 336 ta maxsus harbiy texnika, 47 ta uchuvchisiz qurilma ishdan chiqarilgani ma'lum qilingan.

Rossiya askarlari tomonidan Popova, Novgorovka, Novomixaylovka, Lyubimovka aholi yashash punktlarini, LXR kuchlari Qizil Liman, Torskoe, Kremennaya, Varvarovka, Borovenki aholi punktlarini, DXR kuchlari esa Primorskoe, Priazovskoe, Shevchenko va Berdyanskoe aholi punktlarini egallagani, Mariupol qamalga olingani ma'lum qilingan.

Rossiya Mudofaa vazirligi harbiy operatsiyada rossiyalik kursantlar yoki tezkor chaqiruvdagi askarlar qatnashmayotganini ma'lum qildi. Rossiya tomoni tanklar AQShda ishlab chiqarilgan «Javelin» raketalari bilan urilayotganiga urgʻu bergan. “Zamin” yangiliklarini “Telegram”da kuzatib boring