Pavel Durov Ukrainadagi vaziyat va Rossiyadan ketishga majbur boʻlgani haqida yozdi

^{Foto: «Esquire»}
Telegram asoschisi Ukrainadagi vaziyat va Rossiyadan nega ketgani haqida yozdi.

Agar postlarimni kuzatib borayotgan boʻlsangiz, ona tomondan shajaram Kievga borib taqalishini bilasiz. Onamning qizlik familiyasi Ivanenko — ukraincha, hozir ham Ukrainada yashayotgan qarindoshlarimiz koʻp. Shuning uchun ham fojiali nizo oʻzim va Telegram uchun shaxsan ahamiyatga ega.

«Ayrim odamlar savol tashlashibdi: men qachonlardir Rossiyada yashaganim bois Telegram ukrainaliklar uchun xatarli emasmi? Keling, yaxshisi, Rossiyadagi kareram qanday tugaganini ularga aytib bera qolay», — deb yozdi u.

Toʻqqiz yil ilgari Rossiya va Ukrainadagi eng katta ijtimoiy tarmoq —«VKontakte»ning bosh direktori edim. 2013 yili FXX (Federal xavfsizlik xizmati — tahr.) mendan rossiyaparast prezidentga qarshi norozilik bildirgan ukrainalik VK foydalanuvchilarining shaxsiy ma'lumotlarini berishni talab qildi.

«Men rad etdim, chunki bu ukrainalik foydalanuvchilarimizga nisbatan xoinlik boʻlardi. Shundan soʻng oʻzim asos solgan kompaniyadan haydashdi va men Rossiyadan ketishga majbur boʻldim», — qoʻshimcha qildi Durov.

Oʻz kompaniyam, uyimdan ajraldim, biroq hozir ham hech ikkilanmasdan shunday qilardim. Oʻzim «VKontakte»da 2014 yil aprelida joylagan FXXning skanerlangan oʻsha buyrugʻi va unga kapyushonli it koʻrinishidagi «firmenniy» javob-postimni oʻqisam hanuz gʻururlanaman.

«FXXning talabini bajarmaslik oʻta qaltis ish boʻlgandi. Oʻzim Rossiyada yashardim, jamoam va eski kompaniyam ham shu mamlakatda joylashgandi», — dedi Durov.

«Bu voqealarga ancha boʻldi. Koʻp narsa oʻzgardi: endi Rossiyada yashamayapman, u erda kompaniyam ham, xodimlarim ham yoʻq. Ammo bir narsa oʻzgarmaydi: nima boʻlishidan qat'i nazar, men doim foydalanuvchilarimiz tomonidaman. Ularning shaxsiy hayot huquqi muqaddas. Ayniqsa, hozir, har qachongidanda muhim». “Zamin” yangiliklarini “Telegram”da kuzatib boring