18:02 / 17.02.2018
10 228

Barmoqlar va fe’l-atvor

Barmoqlar va fe’l-atvor
Qo‘llaringiz shakliga, barmoqlaringizga diqqat bilan qarang. Olimlar o‘tkazgan ko‘p yillik tadqiqotlarga ko‘ra, ularning uzunligi, qalinligiga, kaftlarning kengligi katta va kichikligi qarab, fe’l-atvorning qanday ekanligini bilib olish mumkin ekan. Quyidagi keltirilgan ma’lumotlardan aynan o‘zingizga tegishli bo‘lgan shaklni tanlab, o‘qing. Bu orqali fe’l-atvoringiz va o‘zingiz bilmagan boshqa xususiyatlaringiz haqida bilib olasiz.

TO‘RTBURChAK KAFT, KALTA BARMOQLAR
Yutuqlari:
Bunday qo‘l kafti va barmoqlarga ega ayollar hayotda realistdirlar. Ular o‘z oldilariga aniq maqsad qo‘yib, shunga intiladilar, ushalmaydigan orzular haqida o‘ylamaydilar. Bu toifadagi ayollar begonalar bilan tez muloqot o‘rnata oladi, shu bilan birga, ular orasida hamma joyda tartib-qoidani o‘rnatuvchilar ko‘p uchraydi. Saranjomlikni xush ko‘rishadi, pazandalikni ham uddalaydilar. Turli xil marosim va an’analarni qadrlaydilar.

Kamchiliklari: Arzimas narsalardan katta muammo paydo bo‘lishidan cho‘chib yuradilar. Kun tartiblari qanchalik to‘g‘ri taqsimlangan bo‘lmasin, ayrim ishlarni bajara olmaganliklari sabab muammolar yuzaga keladi. Buning natijasida asabiylashish, yurak siqilishiga tez-tez duchor bo‘ladilar.

Maslahat: Yuqoridagi ta’riflar aynan sizga tegishli bo‘lsa, shuni unutmanki, hayotda biron nimani ishonch bilan kutib yashash u qadar to‘g‘ri emas. Shuning uchun ba’zi-ba’zida erkin harakatga ko‘proq e’tibor qarating. Tartib-qoidalarga amal qilaman, deb o‘zingizga jabr qilmang.

UZUNChOQ KAFT, KALTA BARMOQLAR

Yutuqlari: Bu toifaga kiruvchi ayollar biror yangi g‘oya miyalariga kelsa, uni amalga oshirmaguncha tinchimaydilar. Hatto, boshqalarning fikr va orzulariga ham shunday munosabatda bo‘ladilar. Shuningdek, ular usta tashkilotchi, boshqalar ustidan hukmronlik qilish hususiyatiga ega. Yangiliklarga qiziqishlari baland. O‘z ustida ko‘p ishlashni, imkoniyatlarini sinovdan o‘tkazishni yaxshi ko‘radilar.

Ularning surati ham, siyrati ham bir xil, faqat tajriba va amaliyotga ko‘proq suyanadilar. Atrofida sodir bo‘layotgan jarayonlar ular uchun juda ahamiyatli.

Ko‘proq foyda olish uchun imkoniyatlardan o‘rinli va to‘g‘ri foydalana oladilar. Shu bois ularning ishlari doim muvaffaqiyat bilan yakunlanadi.

Kamchiliklari:
Aynan shu toifaga kirsangiz shuni bilingki, shoshilish va hovliqish bilan barcha ishlarga ulgura olmaysiz. Atrofdagilarning diqqat-e’tiboridan va his-tuyg‘ularidan holi bo‘lganda, o‘zingizni yolg‘iz sezasiz. Ko‘pchilikning fikri siz uchun huddi havodek zarur. Shu sababli ko‘p o‘ylanasiz.

Maslahat: Barchasiga ulguraman deb, sog‘ligingizni boy bermang. Hamma narsaga ortiqcha e’tibor berish ko‘p narsani hal qilmaydi. Ko‘proq dam oling, asablaringizni asrang.

TO‘RTBURChAK KAFT, UZUN BARMOQLAR
Yutuqlari: Bu toifa sohibalarining harakati shiddatli va jo‘shqin, his-hayajonga boy. Qaysi ishga qo‘l urmasinlar, hayratda qoldiradigan darajada tez va puxta bajaradilar. Agar atrofdagi voqea-hodisalar ularni hayajonga solmasa, o‘zlarini ma’naviy qashshoq sezadilar. Shu sababli yangilikka yetishish uchun har qanday to‘siqlarni yengib o‘tadi. Ushbu toifadagi ayollar bir joyda uzoq vaqt qololmaydilar, ichki turtkilari doim sayohatga boshlayveradi. Eng qizig‘i, bugun sayohat qilish to‘g‘risida so‘z ochmagan bo‘lsalaru, ertaga safarga otlanib qolishlaridan ajablanmasa ham bo‘ladi. Shuningdek, ular begona yurt hayot tarziga tez ko‘nikadilar.

Kamchiliklari:
Bunday ayollar go‘yo osmonda uchib yuradilar. Ishga boshlari bilan sho‘ng‘ib ketganlaridan oyoqlari ostida nimalar bo‘layotganini payqamaydilar ham. Ba’zan o‘zlaridan boshqa tashvishlar borligini unutib qo‘yadilar.

Maslahat: Sarf qiladigan quvvatingiz o‘rnini to‘ldiradigan ishonchli manbaa toping. Negaki, bir ishga kirishganingizda, bor kuchingizni ishlatib qo‘yasiz. Sizga ko‘proq ruhiyatni mustahkamlovchi omillar yordam beradi. Ko‘proq jismoniy mashqlar bajarganingiz ma’qul.

UZUNChOQ KAFT, UZUN BARMOQLAR
Yutuqlari: Bu toifaga kiruvchi ayollar boshqalar anglamagan narsalarni ham seza oladilar. Boshqalarda hayrat va qiziqish uyg‘otadigan harakatlar ularga butunlay yot. Ichki sezish qobiliyatlari yaxshi rivojlangan. Muammoni hal etuvchi ko‘pgina usullardan qaysi biri yordam berishini aniq biladilar. Agar ularga qimmatbaho sovg‘a hadya qilsangiz ham, qattiq hayratga tushmasalar, ajablanishga o‘rin yo‘q. Bu ularning tabiatiga xos xususiyatdir. Ko‘pincha, ma’naviy va ruhiy kamolotga yetishishni moddiy boylik to‘plashdan ko‘ra afzal biladilar.

Kamchiliklari: Bu guruhga kiruvchi ayollarning yuraklarini turli shubha-gumonlar yemiradi. Aksariyat hollarda o‘z qarashlariga zid fikr yuritadilar. Har bir ishga qattiq berilib ketishlaridan ko‘pincha aziyat ham chekadilar.

Maslahat: Kundalik hayotdagi kishiga zavq va shijoat bag‘ishlovchi jarayonlar keksalik yuz ko‘rsatishining oldini oladi. Shuning uchun odatiy mashg‘ulotlardan qochib, atrofdan huzur-halovat qidirishga, ko‘ngilga hayrat soladigan narsalarni izlashga harakat qiling.
XOSIYaTXON tayyorladi.

Manba: mulohaza.uz

Dasturlash foundation


Ctrl
Enter
Xato topdIngizmi?
Iborani ajratib Ctrl+Enter tugmasini bosing
Yangiliklar » Hayot uchun » Barmoqlar va fe’l-atvor