O‘zbekistonda dollarning rasmiy kursi ilk marta 12 800 so‘mdan oshdi

O‘zbekiston Markaziy banki 15 oktyabrdan boshlab o‘zbek so‘mining AQSH dollariga nisbatan rasmiy kursini 12 803,05 so‘m deb belgiladi. Bu – bir kun oldingidan 22,91 so‘mga yuqori. Shu bilan birga, rasmiy kurs ilk marta 12 800 so‘mlik psixologik nuqtadan o‘tdi.

Ayirboshlash shoxobchalaridagi kurs bu nuqtadan bir necha hafta avval o‘tgandi. 14 oktyabr, dushanba kuni aksariyat banklarda Amerika valyutasining xarid kursi 12 720 – 12 750 so‘m oralig‘ida, sotish kursi esa 12 810 – 12 840 so‘mni tashkil etdi.

So‘nggi kunlarda valyuta birjasida dollar savdosi hajmi oshganini kuzatish mumkin. Oxirgi 10 savdo kunida (30 sentyabrdan 14 oktyabrgacha) jami 1,88 mlrd dollarlik oldi-sotdi bitimlari tuzilgan bo‘lib, bu – avvalgi 10 savdo kuni (16–27 sentyabr, 1,14 mlrd dollar)ga nisbatan 64 foizga yuqori.

O‘zbek so‘mi AQSH dollariga nisbatan yil boshidan buyon (2024 yilning ilk ish kunida kurs 12 338,77 so‘m edi) so‘mga nisbatan 3,76 foizga mustahkamlandi.

Rasmiy kurs aprel oyida 12 700 so‘mdan oshgandi. Ma’lumot uchun, Markaziy bank belgilaydigan xorijiy valyutalarning so‘mga nisbatan rasmiy kursi O‘zbekiston hududida buxgalteriya hisobi, statistika hisoboti va boshqa hisobot maqsadlari uchun, shuningdek bojxona va boshqa majburiy to‘lovlarni hisoblash uchun ishlatiladi.

O‘zbekiston, Dollarning rasmiy kursi, AQSH dollari, Markaziy bank, O‘zbek so‘mi “Zamin” yangiliklarini “Youtube”da kuzatib boring