Rossiyada urush xarajatlari sabab soliqlar oshmoqda

Rossiya hukumati Ukraina urushi xarajatlarini qoplash uchun soliqlarni oshirishga va ijtimoiy sohalarda tejamkorlikka majbur bo‘lmoqda. Uch yildan ortiq davom etayotgan urush byudjetga katta bosim qilmoqda.

Neft va gazdan tushadigan daromad G‘arb sanksiyalari sabab kamaymoqda. Shu bilan birga, davlat xarajatlari keskin oshib, 2025-yilda faqat mudofaa va xavfsizlik uchun 17 trillion rubl($212 milliard) sarflanishi rejalashtirilgan. Bu umumiy xarajatlarning deyarli yarmi hisoblanadi.

Parlament ma’lumotiga ko‘ra, 2028-yilgacha har yili mudofaa bo‘lmagan sohalarda 2 trillion rubl($24,9 milliard) qisqartirish talab qilinishi mumkin. Bu esa ta’lim, sog‘liqni saqlash va boshqa xizmatlarga ta’sir qiladi.

Moliya vazirligi byudjetdagi bo‘shliqni to‘ldirish uchun soliqlarni ko‘tarishga majbur. Mutaxassislar hisobiga ko‘ra, 2025-yilda taqchillik 5–8 trillion rublga($62–100 milliard) yetishi mumkin.

Iqtisodchilar fikricha, Rossiya uzoq muddat sust o‘sish davriga kirib boradi. Shu bilan birga, harbiy xarajatlardan voz kechmaydi, bu esa aholiga mo‘ljallangan dasturlarning qisqarishi va soliqlarning ko‘payishini anglatadi.