Milliy statistika qo‘mitasi e’lon qilgan yangilangan raqamlarga qaraganda, 2025-yilning yanvar–oktyabr oylari davomida mamlakatimizda ko‘rsatilgan bozor xizmatlari qiymati 818,5 trillion so‘mga yetdi. Bu ko‘rsatkich xizmatlar sohasi iqtisodiyotning eng tez o‘suvchi tarmoqlaridan biriga aylanganini yana bir bor tasdiqlab turibdi.
Hududlar bo‘yicha taqsimotga e’tibor qaratilsa, har bir viloyatda bu yo‘nalish bosqichma-bosqich kuchayib, mahalliy iqtisodiy faollikni oshirayotgani ko‘zga tashlanadi:
- Qoraqalpog‘iston Respublikasi — 26,9 trln so‘m
- Andijon viloyati — 42 trln so‘m
- Buxoro viloyati — 33,3 trln so‘m
- Jizzax viloyati — 19,2 trln so‘m
- Qashqadaryo viloyati — 41,7 trln so‘m
- Navoiy viloyati — 20,2 trln so‘m
- Namangan viloyati — 42 trln so‘m
- Samarqand viloyati — 60,3 trln so‘m
- Surxondaryo viloyati — 27,5 trln so‘m
- Sirdaryo viloyati — 11,3 trln so‘m
- Toshkent viloyati — 55,3 trln so‘m
- Farg‘ona viloyati — 55,5 trln so‘m
- Xorazm viloyati — 28,4 trln so‘m
- Toshkent shahri — 312,2 trln so‘m
Ma’lumotlardan ko‘rinib turibdiki, xizmatlar bozorining «lokomotivi» hali ham Toshkent shahri hisoblanadi. Poytaxt mutlaq ustunlikka ega bo‘lib, yagona o‘zi mamlakatdagi umumiy xizmatlar hajmining katta qismini berayotgani bilan ajralib turadi. Undan keyingi pog‘onalarni Samarqand, Farg‘ona va Toshkent viloyatlari egallamoqda — bu hududlarda xizmatlar infratuzilmasi, savdo markazlari, transport aloqalari va sanoat faoliyati faol rivojlanyapti.
Mutaxassislarning ta’kidlashicha, poytaxtda xizmatlar sektori jadal sur’atda oshishining asosiy sababi — aholi juda zich bo‘lgan mintaqa sifatida iste’mol bozori ham yirik. Shuningdek, biznes markazlari, moliyaviy tashkilotlar, savdo majmualari, turli servis xizmatlari va innovatsion startaplar aynan shu yerda jamlangan. Bularning barchasi Toshkentda xizmatlar to‘qimasini yanada kuchaytirib, iqtisodiy harakatni katta aylanmaga solmoqda.
Yurtning boshqa hududlarida ham bu sohaning o‘sishi kutilmoqda. Chunki qisqa muddatda infratuzilma yangilanishi, yangi xizmat turlarining kirishi va raqamli servislarning kengayishi bozor manzarasini mutlaqo o‘zgartirib, raqobatni kuchaytiradi.
Sohadagi o‘sish tendensiyasi shundan darakki, xizmatlar segmenti yaqin yillarda milliy iqtisodiyotning eng daromadli va jonli yo‘nalishlaridan biriga aylanishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
