Ondo Finance asoschisi va bosh direktori, blokcheyn tokenizatsiyasi sohasining kashshoflaridan biri Nathan Allman 32 yoshida olamdan oʻtdi. Kompaniya dushanba kuni X ijtimoiy tarmogʻida eʼlon qilgan bayonotda Allmanning kutilmagan vafoti munosabati bilan chuqur qaygʻuda ekanini maʼlum qildi va uning oila aʼzolariga hamdardlik bildirdi. Bu haqda Cointelegraph.com xabar beradi.
Nathan Allman 2021-yilda Ondo Finance loyihasiga asos solgan boʻlib, u real dunyo aktivlarini (RWA) blokcheyn tizimiga olib kirishda muhim rol oʻynagan. Uning rahbarligida kompaniya 3,86 milliard dollarlik AQSH gʻaznachilik obligatsiyalari, aksiyalar va tovarlarni tokenizatsiya qilishga muvaffaq boʻldi. Hozirda 111 mingdan ortiq investorlar Ondo tomonidan chiqarilgan tokenlashtirilgan aktivlarga egalik qilmoqda.
Allman tomonidan boshlangan tokenizatsiya harakati BlackRock kabi Wall Street gigantlarining eʼtiborini tortdi. U Ondo loyihasini boshlashdan avval Goldman Sachs kompaniyasining raqamli aktivlar jamoasida ishlagan, shuningdek, ChainStreet Capital kripto-xej-fondiga asos solgan edi. Mutaxassislar uning texnologiyalar orqali yanada ochiq va qulay moliyaviy tizim yaratishga boʻlgan ishonchini yuqori baholashgan.
Kompaniya prezidenti Ian De Bode endilikda bosh direktor lavozimini egallashi maʼlum qilindi. De Bode oʻz bayonotida Allman nafaqat kuchli vizioner, balki yaqin doʻst boʻlganini taʼkidlab, uning missiyasi va Ondo loyihasining maqsadlari oʻzgarishsiz qolishini bildirdi. Hozircha oʻlim sabablari haqida batafsil maʼlumot berilmagan.
“Zamin”ni Telegramʻda oʻqing!
