Bir qator kripto kompaniyalar, jumladan Sharplink va Forward Industries, Russell 3000 indeksiga kiritilishi mumkin boʻlgan nomzodlarning dastlabki roʻyxatidan joy oldi. FTSE Russell provayderi tomonidan eʻlon qilingan ushbu roʻyxatda Gemini kripto birjasi va Galaxy Digital xizmat koʻrsatish firmasi ham qayd etilgan. Russell 3000 indeksi AQSHning eng yirik 3000 ta kompaniyasini kuzatib boradi va undan joy olish uchun bozor kapitalizatsiyasi kamida 146,4 million USD boʻlishi talab etiladi. Bu haqda Cointelegraph.com xabar beradi.
Sharplink kompaniyasining bozor qiymati 1,2 milliard USDni tashkil etadi, bu esa unga Russell 2000 indeksiga kirish imkonini beradi. Kompaniya bosh direktori Joseph Chalomning taʻkidlashicha, indeksga aʻzo boʻlish aksiyadorlar bazasini kengaytiradi va kapital bozorlariga chiqish imkoniyatlarini kuchaytiradi. Shuningdek, Solana gʻaznasiga ega Forward Industries ham 350 million USDlik kapitalizatsiyasi bilan ushbu indeksga munosib koʻrilmoqda.
Bitmine Immersion Technologies va Galaxy Digital kompaniyalari esa yanada yirikroq — Russell 1000 indeksiga kirishi kutilmoqda. Bitmine kapitalizatsiyasi 5,7 milliard USDdan oshgan boʻlsa, Galaxy Digital 11,55 milliard USDlik koʻrsatkich bilan ushbu roʻyxatga daʻvogarlik qilmoqda. Bu ularni NVIDIA, Microsoft, Apple va Google kabi texnologiya gigantlari bilan bir qatorga qoʻyadi.
Indekslarga kiritilish kompaniyalar uchun katta muvaffaqiyat hisoblanadi, chunki koʻplab faol va passiv fondlar, jumladan ETFlar, odatda indeks tarkibidagi aksiyalarni sotib oladi. FTSE Russell roʻyxatni iyun oyi davomida yangilab boradi va yangilangan indekslar 26-iyun kuni AQSH birja bozorlari yopilgandan soʻng rasman kuchga kiradi.
“Zamin”ni Telegramʻda oʻqing!
