Seshanba kuni Texasda boʻlib oʻtgan praymerizning hal qiluvchi bosqichida kripto-sanoat tomonidan moliyalashtirilgan siyosiy guruhlar qoʻllab-quvvatlagan nomzodlar gʻalaba qozondi. Bu holat AQSH Kongressi raqamli aktivlar bozori uchun yangi qoidalarni muhokama qilayotgan bir paytda, kripto-industriyaning saylovlardagi taʼsiri ortib borayotganini koʻrsatmoqda. Bu haqda Cointelegraph.com xabar beradi.
Xususan, AQSH Senati uchun kurashda respublikachi Ken Paxton amaldagi senator John Cornyn ustidan yirik hisobda gʻalaba qozondi. Houston okrugida esa demokrat Christian Menefee oʻzining partiyadoshi Al Green ustidan gʻalaba qozonib, shtatning eng tajribali vakillaridan birini oʻrnidan chetlatdi. Stand With Crypto tashkiloti kriptovalyutalarga qarshi pozitsiyasi tufayli Al Green nomzodiga "F" reytingini bergan edi.
Ushbu saylov kampaniyalari kripto-yoʻnalishdagi siyosiy harakat qoʻmitalari (PAC) tomonidan katta mablagʻ sarflanishi bilan ajralib turdi. Ripple va Coinbase kabi kompaniyalar tomonidan qoʻllab-quvvatlanadigan Fairshake super PAC shoʻba korxonasi — Protect Progress, Menefee nomzodini qoʻllab-quvvatlash va uning raqibiga qarshi reklama uchun jami 7,8 million USDga yaqin mablagʻ sarflaganini maʼlum qildi.
Yana bir guruh — Cantor Fitzgerald va Anchorage Digital tomonidan moliyalashtiriladigan Fellowship PAC esa Ken Paxton gʻalabasini taʼminlash uchun taxminan 500 000 USD yoʻnaltirdi. Shuningdek, respublikachilarni qoʻllab-quvvatlovchi Defend American Jobs guruhi ham oʻzining toʻrt nafar nomzodi gʻalabasini qayd etdi.
Bitcoin siyosati boʻyicha ekspert Dennis Porter Menefee gʻalabasini izohlar ekan, kripto-parast demokratning 20 yillik tajribaga ega kripto-muxolifini magʻlub etganini soha uchun ijobiy oʻzgarish deb atadi. Bu gʻalabalar Kongressda raqamli aktivlar strukturasi va Stablecoinlar boʻyicha qonun loyihalari koʻrib chiqilayotgan bir paytda sanoat uchun yangi ittifoqchilar paydo boʻlishini anglatadi.
“Zamin”ni Telegramʻda oʻqing!
