O‘zbekistonda «Yoshlar» tijorat banki tashkil etiladi

O‘zbekistonda “Yoshlar” tijorat banki tashkil etiladi. Bu haqda O‘zbekiston Respublikasida 2019-2020 yillarda yoshlarga oid davlat siyosati sohasida amalga oshiriladigan ishlarni yangi bosqichga olib chiqish bo‘yicha yo‘l xaritasida aytiladi.

Qayd etilishicha, yoshlarning innovatsion g‘oya va tashabbuslarini qo‘llab-quvvatlash hamda ro‘yobga chiqarishlariga ko‘maklashish maqsadida “Yoshlar” tijorat banki tashkil etiladi. Bu borada Vazirlar Mahkamasi qarori loyihasi ishlab chiqiladi.

Bajarish muddati - 2020 yil yanvar. Mas’ul ijrochilar - Markaziy bank, Adliya vazirligi, Moliya vazirligi, O‘zbekiston yoshlar ittifoqi.

Shuningdek, mamlakatda yoshlar tadbirkorligini rivojlantirish maqsadida “Yoshlar kelajagimiz” davlat dasturi doirasida “Har bir yosh - tadbirkor” ijtimoiy harakati yo‘lga qo‘yiladi.

Har bir tuman (shahar)da katta tajriba va salohiyatga ega tadbirkorlar ishtirokida yosh tadbirkorlarning “Start up” loyihalarini qo‘llab-quvvatlashga qaratilgan “Yoshlar tadbirkorligi hududlari” tashkil etiladi.

Qoraqalpog‘iston Respublikasi, viloyatlar va Toshkent shahrida “yosh baliqchi”, “yosh asalarichi”, “yosh bog‘bon”, “yosh pillakor” klasterlari yaratiladi.