«Umrimning oxirigacha bu sharmandalik bilan yashashga toʻgʻri keladi» — Maryam Tillaeva

^{Foto: Instagram / @amiran495}
Oʻzbekiston birinchi prezidenti Islom Karimovning nevarasi, Insta-bloger Maryam Tillaeva turmush oʻrtogʻi Amiran bilan ajrashishi sababi, yarim yalangʻoch surati uning roziligisiz tarqatilgani haqida soʻzlab berdi.

«Erim bilan munosabatlarim mavzusida gapirishni umuman xohlamagandim. Biz hali ham qonunan er-xotinmiz. Lekin biz birga yashamayapmiz, gaplashmayapmiz. Menga turli YouTube-kanallardan intervyu qilish taklifi bilan chiqishdi. Oʻylashimcha, hozir shundoq ham butun dunyoda xaos hukmronlik qilmoqda, global miqyosda turli ziddiyatlar mavjud, shuning uchun oʻz muammolarim haqida gapirishni lozim deb hisoblamayman. Odamlarning tashvishi menikidan ham koʻproq hozir. Agar intervyu beradigan boʻlsam, u erda oʻzimning erishgan yutuqlarim haqida gapirishim kerak, men bilan yuz bergan koʻngilsiz holat haqida esa ozgina toʻxtalib oʻtsam boʻladi.

Nima uchun jonli efirga chiqib, bu mavzuda gapiryapman? Kecha erimning bir intervyusiga koʻzim tushdi, u erda men haqimda soʻz borayotgan ekan. Erim oʻz fikrlarini chiroyli shakllantira oladi, boshqalar koʻziga qanday qilib olijanob inson boʻlib koʻrinishni yaxshi biladi. Ammo aslida unday emas. Men bir yarim yil bu inson bilan yashab, qanday kunlarni boshdan kechirganimni hammaga soʻzlab bermoqchi emasman. Bugun qanday his-tuygʻular bilan yashayotganimni ham boʻlishmayman. Agar boshimdan nimalar oʻtganini bilsangiz, shokka tushib, menga rahmingiz kelgan boʻlardi. Men oʻzimga achinishlarini xohlamayman. Shuning uchun koʻrgan-kechirganlarimni faqat yaqin doʻstlarimgina biladi. Ular yordamga muhtoj paytim meni qoʻllab-quvvatladi. Men haqiqat tarafman, odamlar aslidan koʻra yaxshiroq koʻrinish uchun yolgʻonlar toʻqib chiqarishiga qarshiman.

Men Moskvaga oʻsha insonni sevganim, u bilan keyingi hayotimni qurishni istaganim uchun koʻchib oʻtgandim. Yosh boʻlganim yoki nimagadir tayyor boʻlmaganim ayrilishimiz sababchisi emas. Bu inson haqida yomon gapirishni istamayman, bizning ajrashishimizga menga oʻtkazilgan ruhiy va jismoniy bosim sabab boʻldi. Bundan tashqari, men gapirishni istamaydigan boshqa sabablar ham bor. Hali oʻzimga kelolmadim, buning uchun psixolog bilan uzoq muddat ishlashim kerak.

Men sodda va ahmoq boʻlgan ekanman. Shuning uchun ham boshimdan oʻtganlarga qaysidir ma'noda oʻzim ham sababchiman. Osmonda uchib yurgan ekanman. Shuni aytishim kerakki, bolaligimda maktabda juda koʻp tahqirlashlarni boshdan kechirganman. Musulmon boʻlganim uchun boshimni unitazga tiqishlar, haqoratlarni koʻrganman, kaltaklanganman. Ammo men bir yarim yillik turmushimda koʻrganlarimni hatto dushmanimga ham ravo koʻrmayman. Bu haqda gapirish juda qiyin, sababi oilam, menga yaqin insonlarim va oʻzim aziyat chekdim. U insondan buyogʻiga meni, oilamni, buvimni umuman tilga olmaslikni soʻragan boʻlardim», — deydi Maryam Tillaeva.

Maryam, shuningdek, muhokamalarga sabab boʻlgan yarim yalangʻoch surati turmush oʻrtogʻi tomonidan uning roziligisiz tarqatilgani haqida ham soʻzlab berdi.

^{Foto: Instagram / @amiran495}
«Amerikada mening muhokamalarga sabab boʻlgan yalangʻoch suratimni tarqatganlik uchun meni himoya qiladigan qonun moddasi bor. U Revenge porn deb nomlanadi. Men bunday suratimni hech qachon ijtimoiy tarmoqqa joylamagan boʻlardim, rozilik ham bermaganman. Biroq sen har kunlik manipulyatsiya hamda tahqirlashga asoslangan munosabatlarda boʻlsang, sen insonning «sevgisi»ni yoʻqotmaslik uchun, uni ranjitmaslik uchun hamma narsaga tayyor boʻlasan. U 35 yoshida, ongli ravishda shunday oʻyin oʻynadi.

Amiran ijtimoiy tarmoqlar shunday ishlaydi, dedi. ‘Sen hech narsani tushunmaysan’, dedi. Bu xayp, men uni qoʻllab-quvvatlashim kerakligini aytdi, ‘Buni ikkimiz uchun qilyapman’, dedi. Men yigʻladim. Hozir esa shu haqda oʻylab, oʻzimni shunchalik erga urganimdan afsuslanib ketyapman. Uning postidan keyin menga tasavvur qilib boʻlmaydigan nafrat yogʻildi. Meni fohisha deb atashdi, oʻlim tilashdi, tahdidlar boʻldi. Oʻsha rasmni Oʻzbekistonda yashaydigan hamma koʻrdi, uni qarindoshlarim, buvilarimga koʻrsatishdi. Bu — men hayotimning oxirigacha shu sharmandalik bilan yashashga toʻgʻri keladigan holat.

Men erimning bu qilmishidan soʻng uni tushunmay qolgandim, biroq uni sevganim uchun qoʻllab-quvvatlab, faqat oʻzimga yomon qilardim. Oilam oldida, otam, onam, ukam, singlim, bobom, buvim va xalqimiz oldida uyatga qoldim. Shunda ham Amiran taraf boʻldim. Oʻshanda aqlim qaerda edi, tushunmayman. U oʻshanda birgina posti bilan ota-onam bilan munosabatlarimga butunlay nuqta qoʻydi. Ularni tushunaman. Amiran niyatiga etdi. Meni oilam va doʻstlarimdan ajratib qoʻydi. Men esa oʻshanda oʻzim tushunmagan holda juda qattiq depressiyaga tushib qolgandim», — deydi Maryam.

Maryam Tillaevaning aytishicha, Amiran Sardarov uning bobosi sovgʻa qilgan ziragini oʻgʻirlagan.

«Men uni Xudoga soldim. Men hayot yoʻlimda davom etaman, u esa oʻzining narkotik botqogʻida, jinnicha shoulari bilan qolaversin. Lekin menga bobom sovgʻa qilgan zirakni oʻgʻirlash bu odamning kimligini koʻrsatadi. Bu erda gap pulda ham emas, oʻsha narsaning menga qanchalik qadrli ekanligida. U shunaqa kimsa. Tushunishimcha, bu hammaga allaqachon ayon edi», — deydi Maryam.

^{Foto: Instagram / @mashatilly}
Ma'lumot uchun, Maryam Tillaeva 2021 yilning 13 aprel kuni rossiyalik bloger Amiran Sardarovga turmushga chiqqan edi. Ularning toʻyi Las-Vegasdagi mehmonxonalardan birida, juftlikning doʻstlari ishtirokida boʻlib oʻtgan. Maryam toʻyi tor doirada, kamtarona tarzda nishonlanganiga qaramay, oʻz orzusidagidek oʻtganini aytgan edi. U toʻydan keyin Instagram sahifasini faol yurita boshladi, uning kuzatuvchilari soni qisqa muddat ichida bir necha yuz mingga koʻpaydi. U sahifasida kundalik turmush tarzi haqida hikoya qilib berardi.

Amiran Sardarov 2021 yilning 5 avgust kuni rafiqasi Maryamning ichki kiyimsiz tushgan suratini Instagram’dagi sahifasiga joyladi. Ushbu surat ijtimoiy tarmoqlarda muhokamalar va keskin tanqidlarga sabab boʻldi. Instagram foydalanuvchilari Maryamning ushbu nomaqbul suratiga tanqidiy munosabatini hatto uning onasi Lola Tillaeva-Karimova sahifasida ham bildira boshladi. Lola Tillaeva-Karimova ushbu holatni qizining ongli hayoti Evropada oʻtgani, nima mumkin-u, nima mumkin emasligi haqida oʻz tushunchalari borligi bilan izohlagan edi. Shuningdek, internet foydalanuvchilaridan qizining suratiga qaramaslik, buning oʻrniga boshqa ishlar bilan shugʻullanishga chaqirgan edi.

Keyinroq Amiran Sardarov sahifasidan ushbu suratni oʻchirib tashlab, nomaqbul hazili uchun Karimovlar oilasidan kechirim soʻragan edi. Maryam esa turmush oʻrtogʻiga uning kontenti yoqishini, hech kimdan kechirim soʻrash kerak emasligini aytgan edi.

Amiran intervyularidan birida toʻydan soʻng, Maryamning ota-onasi ular bilan gaplashmay qoʻyganini aytgan edi.

2022 yilning fevral oyida Amiran Maryam bilan ajrashganini e'lon qildi.

«Biz Masha bilan ajrashdik, afsuski, shunaqasi ham boʻladi. Senga hayotimda boʻlganing uchun minnatdorchilik bildirmoqchiman. Sen yorqin, aqlli va shijoatlisan. Har doim shunday boʻlib qolishingni tilayman. Hech qachon gʻam chekma! Aminmanki, hayotingdagi eng yaxshi kunlar hali oldinda, oʻz baxtingni topasan. Senga hammasi uchun rahmat!», — degandi Amiran Sardarov. “Zamin” yangiliklarini “Telegram”da kuzatib boring