Komil Allamjonov «Ozodlik radiosi» prezidenti va o‘zbek xizmati bosh muharriri bilan uchrashdi

^{Foto: t.me/allamjonov_ki}
Komil Allamjonovning yozishicha, «Ozod Yevropa Radiosi / Radio Svobodnaya Yevropa («Ozodlik radiosi») mediakorporatsiyasi prezidenti va bosh ijrochi direktori Jeymi Flay va «Ozodlik»ning o‘zbek xizmati bosh muharriri Pahlavon Sodiq bilan navbatdagi, ammo yuzma-yuz uchrashuv o‘tkazilgan.

Ma’lum qilinishicha, uchrashuvda hamkorlik imkoniyatlari muhokama qilingan va har ikki tomon uchun dolzarb masalalar yuzasidan fikr almashilgan.

Ma’lumot uchun, «Ozodlik radiosi» bir qancha Sharqiy Yevropa mamlakatlari hamda MDH respublikalariga eshittirishlar olib boruvchi xalqaro radiostansiyadir. «Ozodlik radiosi» 28 tilda, shu jumladan, o‘zbek tilida ham ishlaydi.

Radioga sovuq urush paytida kommunizmga qarshi stansiya sifatida Germaniyaning Myunxen shahrida asos solingan. 1949 yildan 1995 yilgacha stansiyaning asosiy binosi shu yerda bo‘lgan. 1995 yil stansiyaning markazi Chexiya poytaxti Pragaga ko‘chirilgan.

Bundan oldin Milliy mass-mediani qo‘llab-quvvatlash va rivojlantirish jamoat fondi raisi Komil Allamjonov O‘zbekiston matbuot erkinligi indeksida 133-o‘ringa chiqqaniga munosabat bildirgandi. “Zamin” yangiliklarini “Youtube”da kuzatib boring