Toshkent xalqaro aeroportida 10 dona buqalamun olib kirayotgan fuqaro ushlandi

^{Foto: Davlat bojxona qo‘mitasi}
Toshkent xalqaro aeroportida buqalamunlar olib kirayotgan fuqaro qo‘lga tushdi. Bu haqda Davlat bojxona qo‘mitasi xabar qildi.

Qayd etilishicha, 31 avgust kuni Misrdan Toshkentga uchib kelgan fuqaro Y.J. xalqaro aeroportda yashil yo‘lakdan harakatlanayotib, bezovtalanishi tufayli o‘rnatilgan tartibda bojxona ko‘rigidan o‘tkazilgan. Natijada ushbu shaxsning yuklari orasidagi plastik idishda 10 dona buqalamun borligi aniqlangan.

^{Foto: Davlat bojxona qo‘mitasi}
Ushbu buqalamunlarning umumiy qiymati 54,7 million so‘mni tashkil qilishi ma’lum bo‘lgan.

Hozirda buqalamunlar Toshkent hayvonot bog‘iga topshirilgan. Tashish va saqlash qoidalariga rioya qilinmagani sababli mutaxassislar tomonidan ulardan 6 tasining ahvoli og‘irligi ma’lum qilingan.

^{Foto: Davlat bojxona qo‘mitasi}
Hozirda yuqoridagi holatlar yuzasidan bojxona organlari tomonidan surishtiruv harakatlari davom ettirilmoqda. “Zamin”ni Telegramʻda oʻqing!