Turkiya prezidenti Imom Buxoriy ordeni bilan mukofotlandi

^{Foto: Prezident matbuot xizmati}
Prezident farmoni bilan Turkiya rahbari Rajab Toyyib Erdoʻgʻon oliy darajali Imom Buxoriy ordeni bilan mukofotlandi. Unga bu mukofotni Shavkat Mirziyoev topshirdi. Oʻzbekiston prezidenti uchrashuv davomida nutq soʻzladi.

- Hurmatli Rajab Toyyib Erdoʻgʻon janobi oliylari! Sizlarni Samarqandda koʻrib turganimdan xursandman. Bugun tarixiy voqea. Bugun qardoshim Rajab Toyyib Erdoʻgʻon Oʻzbekistonning oliy darajali Imom Al-Buxoriy ordeni bilan taqdirlandi.

Xabaringiz bor, 2017 yili BMTning 72-sessiyasida ulugʻ bobomiz Imom Al-Buxoriyning merosini oʻrganish haqida gapirgandim va oʻsha paytda Turkiya prezidenti, qardoshim Rajab Toyyib Erdoʻgʻon bu fikrlarni qoʻllab-quvvatlagan edi. Oʻzbekistonda Imom Al-Buxoriy nomidagi Toshkent Islom universiteti faoliyat koʻrsatmoqda.

Ulugʻ ajdodimiz rivoyat qilgan hadisi sharifda: «amallar niyatlarga bogʻliqdir» deb ta'kidlanadi. Shu bois ham biz Oʻzbekistonda Imom Buxoriy bobomizning merosini chuqur oʻrganish uchun Samarqand zaminida ul zotning nomida xalqaro ilmiy-tadqiqot markazi va hadis ilmi maktabini tashkil etdik.

Oʻzbekiston xalqi Sizning qardosh ellarimiz oʻrtasidagi doʻstona aloqalarni keng qamrovli strategik sheriklik darajasiga olib chiqish, oʻzaro manfaatli loyihalarni samarali amalga oshirish borasidagi shaxsiy hissangizni yaxshi biladi va yuksak qadrlaydi. Ishonchim komilki, umumiy til va madaniyatga, ajdodlarimizning boy merosiga, mushtarak intilishga asoslangan doʻstlik va qardoshlik munosabatlarimiz yanada ravnaq topadi, — dedi Shavkat Mirziyoev.

^{Foto: Prezident matbuot xizmati}
Turkiya prezidenti ham, oʻz navbatida, nutq soʻzladi.

- Hurmatli prezident, aziz mehmonlar, sizlarni aziz tuygʻularim ila salomlayman. Fiqh ilmini egallagan kishi nomidagi ordenning menga berilishini yuksak qadrlayman. Ushbu orden mamlakatlarimiz oʻrtasidagi azaliy va abadiy hamkorlikning natijasi deb bilaman.

Buyuk bir faxr ila, gʻurur ila ushbu yuqori darajali ordenni olishdan yana bir bor baxtli ekanimni ta'kidlagan holda qardoshim Shavkat Mirziyoevga minnatdorlik bildiraman. Avvalambor, shuni aytmoqchimanki, talabalik yillarimizda Imom al-Buxoriyning hadislar toʻplami bilan yaqindan tanishganmiz. Bu biz uchun avvalambor eng muhim manba sifatida qoʻllanilgan. Biror hadis haqida gap ketganda, biz ushbu hadislar kitobiga murojaat qilganmiz, — deydi Erdoʻgʻon. “Zamin” yangiliklarini “Telegram”da kuzatib boring