Rektor Kongratbay Sharipov: “Superkontrakt ilojsizlikdan o‘ylab topilgan usul”
Kongratbay Sharipov
Foto: TDIU axborot xizmati
Superkontrakt o‘zi aslida yaxshi emas. U ilojsizlikdan o‘ylab topilgan usul. Lekin bozor iqtisodiyotiga o‘tish davrida kerak. Bu haqda Toshkent davlat iqtisodiyot universiteti rektor Kongratbay Sharipov jurnalistlar bilan muloqotda fikr bildirdi.
Kongratbay Sharipovning aytishicha, superkontraktning yaxshi va yomon tomonlari bor.
“Abituriyent aynan shu universitetda o‘qiyman, boshqasida o‘qishni istamayman, desa biz unga imkoniyat beryapmiz: marhamat, kontraktni to‘lab, o‘qiyver, deb. O‘zi aslida superkontrakt yaxshi emas. U ilojsizlikdan o‘ylab topilgan usul. Lekin bozor iqtisodiyotiga o‘tish davrida kerak bo‘lmoqda”, — dedi rektor.
Kongratbay Sharipov superkontrakt yoshlarga berilayotgan qo‘shimcha imkoniyat ekanini aytib, qay tomondan ijobiy jihatlari borligini aytdi.
“Superkontraktni yaxshi tomoni bizning universitetda 700-800 nafar ijtimoiy himoyaga muhtoj talabalar bor. Ularni qo‘llab–quvvatlash uchun yiliga har biriga 5 million so‘mgacha pul beramiz. Biz o‘zini o‘zi moliyalashtiradigan universitet bo‘lganimiz uchun manba ham o‘zimizda. Bizda boshqa daromad manbai yo‘q. Shu bilan birga, yotoqxonalarga qo‘shimcha joylar yaratamiz, qurilishlar qilamiz. Chet eldan keladigan professor-o‘qituvchilar bor. Ularning maoshi yuqori—oyiga kamida 2-3 ming dollardan to‘lashimiz kerak. Yaʼni bu pullarning barchasi maqsadli ishlatiladi”, — dedi u.
Rektorning qo‘shimcha qilishicha, u rahbarlik qilayotgan universitetda superkontrakt o‘rinlari kamaytirilmoqda.
Bundan oldingi yillarda 640 ta o‘rin ajratilgan bo‘lsa, o‘tgan yili 330 ta ajratilgan. Bu yil undan ham kamayishi mumkin. Eng qizig‘i, biz 3 yildan beri superkontrakt narxini oshirmadik. Masalan, talaba Turizm fakultetida o‘qisa, kontrakt 6 million so‘m. Superkontrakt esa shuning 10 barobari — 60 million so‘m”, — dedi Kongratbay Sharipov.
Avvalroq sog‘liqni saqlash vaziri Amrillo Inoyatov hukumatga tibbiyotda superkontraktni yo‘qotish bo‘yicha taklif kiritilganiniaytgandi.
“Superkontrakt masalasida fikrim ijobiy emas. Tibbiyotda o‘qish osonmas. Gap talabaning o‘qishida va bizning filtrimizda. Xohlagan talaba superkontraktga kirishi mumkin, butun dunyoda tendensiya shunaqa. Eng asosiysi, biz filtrni xalqaro talablar darajasida qilib qo‘ysak, talabalar o‘z-o‘zidan filtrlanadi”, — degan u.
