2024 yilda O‘zbekistonni eng issiq yoz kutayotgan bo‘lishi mumkin

2024 yilda O‘zbekiston tarixidagi eng issiq yoz kuzatilishi mumkin. Bu haqda «O‘zgidromet» xabar berdi.

«Butunjahon meteorologlari prognozlariga ko‘ra, hozirda kuzatilayotgan El-Ninyo hodisasi 2024 yil apreligacha davom etadi. Ushbu hodisa 10 ta raqamli iqlim modellari hisob-kitoblarining o‘rtacha natijasidir. Keyinchalik, ilmiy asoslarga ko‘ra, O‘zbekistonda odatdagi issiq yoz fasli (Toshkentda havo harorati +40 darajagacha), quruq kuz va sovuq qish bilan tavsiflangan La-Ninyo jarayoni rivojlana boshlaydi. Quruq kuz, ya’ni yog‘ingarchilik miqdori me’yordan past bo‘lishi kutilmoqda», deyiladi xabarda.

Qayd qilinishicha, issiq yoz O‘zbekiston iqlimi uchun tez-tez uchraydigan hodisa. Bunda janub va cho‘l hududlarida +40...+45 darajagacha, qolgan hududlarda esa +40...+42 darajagacha issiq bo‘ladi. Eng issiq havo yoz oyida odatda 5-7 kun davom etadigan termal tushkunlik bilan bog‘liq va bunday holat 2-3 marotaba kuzatiladi.

Ma’lumot o‘rnida, «El-Ninyo» (ispancha – bolakay) ob-havo fenomeni o‘rtacha 2-7 yilda bir marta sodir bo‘ladi va odatda 9 oydan 12 oygacha davom etadi. Bu Tinch okeani markaziy va sharqiy tropiklarida suv yuzasidagi haroratning ko‘tarilishi bilan bog‘liq iqlim rejimi hisoblanadi. «El-Ninyo» dunyoning ko‘plab qismlari va okean mintaqalarida harorat rekordlari va haddan tashqari issiq ob-havo sharoiti ehtimolini sezilarli darajada oshiradi. “Zamin” yangiliklarini “Telegram”da kuzatib boring