Tanzila Norboyeva Ummon Sultonligining O‘zbekistondagi elchisi bilan uchrashuv o‘tkazdi

^{Foto: Senat matbuot xizmati}
Oliy Majlis Senati raisi Tanzila Norboyeva 27 may kuni Ummon Sultonligining O‘zbekistondagi favqulodda va muxtor elchisi Vafo Jabr Nosir al-Busaidiy bilan uchrashuv o‘tkazdi. Bu haqda Senat matbuot xizmati xabar berdi.

Uchrashuvda ikki mamlakat o‘rtasida savdo-iqtisodiy, madaniy-gumanitar va parlamentlararo aloqalarni rivojlantirish va yangi bosqichga olib chiqish masalalari ko‘rib chiqildi.

Tomonlar, o‘zaro savdo aylanmasi ko‘rsatkichi ikki davlatning salohiyatini ifoda etmasligini, tadbirkorlar o‘rtasida qo‘shma biznes loyihalarni faollashtirish lozimligini ta’kidladi.

Muloqot davomida fan, ta’lim, madaniyat yo‘nalishlaridagi hamkorlik, mamlakatlarning turizm salohiyatidan yanada kengroq foydalanish bo‘yicha amaliy sa’y-harakatlarni birlashtirish bo‘yicha fikr almashildi.

Suhbat chog‘ida parlamentlararo muloqotni o‘zaro tashriflar orqali faollashtirish, ikki mamlakat qonun chiqaruvchi organlari tegishli qo‘mitalari o‘rtasida tajriba almashish va yaqin aloqalarni o‘rnatish muhimligi qayd etildi.

Uchrashuv yakunida diplomat ikki tomonlama munosabatlarni bundan keyin ham yanada rivojlantirish uchun bor imkoniyat va salohiyatini ishga solishini bildirib o‘tdi. “Zamin” yangiliklarini “Odnoklassniki”da kuzatib boring