Hind eri o‘g‘lini o‘g‘irlab ketgan, kavkazlik eri tansoqchi yollagan, uchinchi eri...: xonanda Sogdiana hozir qanday yashaydi?

Asli toshkentlik Oksana Nechitaylo muxlislariga Sogdiana taxallusi bilan tanish. U 2000 yilda “Mening ko‘nglim” debyut albomi chiqqandan keyin tanila boshlaydi. 2006 yilda Sogdiana Rossiyaning “Yulduzlar fabrikasi” loyihasining oltinchi mavsumida ishtirok etganidan so‘ng mashhurligi keskin oshib ketadi — “Ovora bo‘lma”, “Netay”, “Mening shahzodam”, “Yurak mahzun” kabi qo‘shiqlari hamma joyda yangraydi.

Sogdiananing suratlariga qarab 40 yoshda ekaniga ishonish qiyin. U shunchalik yosh ko‘rinadiki, uch farzandning onasi deb o‘ylamaysiz.

Bolalikdan musiqaga muhabbat

Sogdiananing haqiqiy ismi — Oksana Nechitaylo. Sharqona ko‘rinishi va ajoyib taxallusiga qaramay, u ukrain millatiga mansub. Oksana 1984 yil 17 fevralda Toshkent shahrida tug‘ilgan. Uning oilasi harbiy xizmatchi bo‘lgan bobosi tufayli O‘zbekistonga kelib, qo‘nim topgan. Cherkov xorida qo‘shiq kuylagan buvisi nevarasida musiqaga, qo‘shiq aytishga mehr uyg‘otadi.

Oksana bolaligida rasm chizish va raqsga qiziqqan, shuningdek, konservatoriya qoshidagi ixtisoslashtirilgan maktabda fortepiano bo‘yicha tahsil olgan. 14 yoshida u Butunrossiya pianinochilar tanlovi laureati bo‘ladi. Bundan tashqari, u vokal bilan jiddiy shug‘ullana boshlaydi va 1999 yilda professional qo‘shiqchilar o‘rtasida mashhur “Sado-99” qo‘shiqlar tanlovida sovrindor bo‘ladi.

Oksana Nechitaylo maktabni tugatgach, O‘zbekiston davlat konservatoriyasining estrada bo‘limi fakultetiga o‘qishga kiradi. Uni yutuqlar uzoq kuttirmaydi: Oksana “Mening yurtim kuylari” respublika estrada xonandalari tanlovi laureati bo‘ladi. Bir yildan so‘ng Sankt-Peterburgdagi “Yulduzlarga yo‘l” estrada qo‘shiq ijrochilari xalqaro tanloviga yo‘l oladi.

^{Sogdiana otasi bilan}
Xonanda Bolgariya va Italiyadagi festivallarda ham o‘z iste’dodini namoyon etadi. U 17 yoshida o‘zbek estrada sahnasini zabt eta boshlaydi — rus, o‘zbek va ingliz tillaridagi qo‘shiqlaridan iborat “Mening ko‘nglim” nomli birinchi albomini chiqaradi. Ikki yil o‘tgach, “Nihol” davlat mukofotiga sazovor bo‘ladi.

“Yulduzlar fabrikasi”

2006 yilda Sogdiana Viktor Drobish prodyuserlik qilgan “Yulduzlar fabrikasi” realiti-shousining oltinchi mavsumi ishtirokchisi bo‘ladi, u bilan birga Zara, Dmitriy Koldun va Proxor Shalyapinlar ham bor edi. Shouda Sogdiana Larisa Dolina va Vladimir Kuzmin bilan duet kuylashga muvaffaq bo‘ladi. Biroq prodyuser Viktor Drobish uning taxallusini juda noodatiy deb hisoblaydi va muxlislar buni eslab qolishlariga shubha qiladi.

Shou ijodkorlari xonandadan haqiqiy ismi — Oksanadan foydalanishni talab qiladi, ammo qiz o‘z pozitsiyasida qat’iy turib oladi. Keyin Drobish onasining qizlik ismini qo‘shishni taklif qiladi — Fedorinskaya. Ammo bir necha hafta o‘tgach, taxallus hammaga yod bo‘lib ketgani ma’lum bo‘ladi.

Sogdiana Dima Koldun va Zara kabi g‘oliblar uchligiga kirmagan bo‘lsa-da, loyihada ishtirok etish unga bebaho tajriba va yangi imkoniyatlar beradi. Aynan “Yulduzlar fabrikasi”da u “Yurak mahzun” qo‘shig‘ining rus tilidagi versiyasi bo‘lgan “Serdse magnit” hitini ijro etadi. Noyabr oyida ushbu kompozitsiya sabab “Oltin grammofon” haykalchasini qo‘lga kiritadi.

Hamma biladigan, sevadigan va men bilan birga kuylay oladigan qo‘shig‘im borligidan xursandman. Ko‘p odamlar meni u bilan bog‘lashadi — bu juda zo‘r! Qolaversa, hech kim ishonmaganda men bu qo‘shiqqa juda qattiq ishondim. Hamma menga bu hech qachon hit bo‘lmaydi, buni ko‘rsatish umuman sharmandalik ekanini aytdi. Lekin bu hayotimdagi o‘zgacha qo‘shiq ekanligiga ishonchim komil edi va men harakat qilishdan to‘xtamadim, — deydi Sogdiana intervyularidan birida.

“Yulduzlar fabrikasi”dan keyingi karyera

“Yulduzlar fabrikasi” loyihasi tugagach, Sogdiananing hayoti tubdan o‘zgaradi. Birinchidan, u shoudagi hamkasblari bilan Rossiya va MDH mamlakatlariga uzoq muddatli gastrol safariga chiqadi, keyin birinchi rus tilidagi albomi ustida ish boshlanadi. Bu davrda Sogdiana “Moviy osmon” (“Sineye nebo”) qo‘shig‘i uchun ikkinchi “Oltin grammofon” va rus ommabop musiqasini rivojlantirishga qo‘shgan hissasi uchun Moskva merining “Pilar” mukofotiga sazovor bo‘ladi.

2011 yilga kelib Sogdiana uchta albom chiqaradi (ikkitasi o‘zbek, bittasi rus tilida), o‘nlab mukofot va sovrinlarga sazovor bo‘ladi, 12 ta klip suratga oladi va Checheniston xalq artistiga aylanadi. Xuddi shu yili uning to‘rtinchi albomi — “Edem” chiqadi. 2018 yilda Sogdiana Goldenlook Management Company bilan hamkorlik qilishni boshlaydi va “Men seni tanlayman” nomli yangi albomini chiqaradi.

2021 yilda u “Yurak mahzun” hitining yangilangan versiyasini taqdim etadi, shuningdek, qo‘shiqchi Samira bilan ijro etgan Mi Amore va “Sharq malikasi” yangi qo‘shiqlarini chiqaradi. Bundan tashqari, Sogdiana Avraam Russo bilan “Net nevozmojnogo” qo‘shig‘ini va qozog‘istonlik qo‘shiqchi Abdulkarim bilan Eurasian Music Awards-2019 tanloviga nomzod bo‘lgan “Kolso” kompozitsiyasini yozadi.

Hindistonlik tadbirkor bilan nikohi

Sogdiananing birinchi turmushi atigi bir yarim yil davom etgan. U o‘zining bo‘lajak turmush o‘rtog‘i hindistonlik tadbirkor Ram Govind bilan tug‘ilgan kun bazmida tanishgan. Ularning ish yuzasidan boshlangan munosabatlari tez orada romantikaga aylanadi.

Dastlab Ram unga sharqona ertakdagi haqiqiy shahzodadek tuyuladi: eri unga g‘amxo‘rlik qiladi, qimmatbaho sovg‘alar beradi. Ammo bu davr tezda tugaydi. An’anaviy hind urf-odatlari bo‘yicha o‘tkazilgan to‘ydan so‘ng Ram Sogdiana xonandalikdan ketishini talab qiladi. Shov-shuvli ajralishdan so‘ng turmush o‘rtog‘i ularning o‘g‘li Arjunni o‘g‘irlab ketadi. Xonanda ikki yarim yil davomida bolasini ko‘rolmaydi va qattiq depressiyaga tushib qoladi.

Vaqt o‘tishi bilan sobiq turmush o‘rtoqlar yarashishadi. Sogdiana Ramni kechirishga o‘zida kuch topa olganini tan oladi — uni farzandi uchun kurashgan dono va g‘amxo‘r ota deb biladi.

Ingushetiyalik tadbirkor bilan nikohi

Sogdiananing ikkinchi turmush o‘rtog‘i ingushetiyalik tadbirkor Bashir Kushtov edi. Ular 2009 yilda turmush qurishadi va tez orada Mikoyil ismli o‘g‘il ko‘rishadi. Xonanda karyerasini vaqtincha to‘xtatadi va o‘zini butunlay oilasiga bag‘ishlaydi. U dastlab yangi turmush tarzini yoqtirganini tan oladi, lekin vaqt o‘tishi bilan sahnasiz yasholmasligini anglaydi.

Bu nikoh atigi ikki yil davom etadi. Sogdiana yana birinchi turmushida bo‘lgani kabi muammolarga duch keladi: eri zulmkor bo‘lib, professional va shaxsiy hayotini nazorat qilishga intiladi. Keyinroq Sogdiana ajrashishiga Bashir Kushtovning rashki sabab bo‘lganini tan oladi. U xotiniga shunchalik ishonmaganidan unga ikkita tansoqchi yollaydi — ular xonandadan bir qadam ham ortda qolmay, kuzatishadi. Soqchilar Bashirga sahnada va sahna ortida sodir bo‘lgan hamma narsa haqida xabar berishadi, hatto hamkasblari bilan ko‘rishganda yuzidan o‘pganini ham aytishadi.

Vaqt o‘tishi bilan xonandaning sabri tugaydi. Uning so‘zlariga ko‘ra, turmush o‘rtog‘ining doimiy nazorati va rashki uni hayot quvonchidan sekin-asta mahrum qilgan. U do‘stlari va hamkasblari bilan uchrashishni to‘xtatadi va omma oldiga chiqishi tobora qiyinlashadi.

Jiddiy suhbatdan keyin er-xotin ajralishga qaror qiladi. Birgalikda farzandli bo‘lishlariga qaramay, ular kam muloqot qiladi. Sogdiananing ta’kidlashicha, vaqt o‘tishi bilan barcha noroziliklar unutilgan, hozirda u sobiq erlari bilan do‘stona munosabatlarni saqlashga harakat qiladi. 2022 yilning bahorida Sogdiananing ikkinchi nikohi hammaning e’tiborida bo‘ladi: “sariq” matbuot uning sobiq eri Bashir Kushtovning firibgarlikda ayblanib hibsga olingani haqida xabar beradi. 2023 yil yozida Bashir uch yarim yilga umumiy rejimdagi koloniyada to‘rt yillik sinov muddatiga hukm qilingani ma’lum bo‘ladi.

Uchinchi yashirin nikohi

2019 yil aprel oyida xonandaning uchinchi marta turmushga chiqqani uning ko‘plab muxlislarini hayratda qoldiradi. Sal avval Sogdiana boshqa turmushga chiqmasligini aytgan edi. Ma’lum bo‘lishicha, to‘y bir yil avval bo‘lib o‘tgan. Uning ikkinchi o‘g‘li Mikoyilning tug‘ilgan kunida ziyrak jurnalistlar va Sogdiananing muxlislari uning nomsiz barmog‘idagi uzukni ko‘rishgan. Bu jamoatchilikda katta qiziqish uyg‘otadi va jurnalistlar darhol xonandaga savollar bilan murojaat qilishadi.

Sogdiana hech narsani yashirmay, haqiqatan ham turmush qurganini tan oladi. U erining ismi Maksim ekanligini aytadi, ammo qolgan tafsilotlarni ochiqlamaydi. Bir oz vaqt o‘tgach, matbuotda Maksim davlat xizmatchisi va shou-biznesga hech qanday aloqasi yo‘qligi haqida ma’lumot paydo bo‘ladi. Rasmiy nikohdan o‘tganidan bir yil o‘tgach, ularning oilasida yana bir o‘g‘il — Leo tug‘iladi.

Sogdiananing farzandlari

Sogdiananing turli nikohdan tug‘ilgan uchta o‘g‘li bor: Arjun (2007 yilda tug‘ilgan), Mikoyil (2010 yilda tug‘ilgan) va Leo (2019 yilda tug‘ilgan). Arjun va Mikoyil uzoq vaqt turli mamlakatlarda yashab, unchalik yaqin emas. Sogdiana kenja o‘g‘li bilan Toshkentga ko‘chib kelganidan keyingina ular birga yashay boshlagan.

Boshida aka-ukalar o‘rtasida bir oz kelishmovchiliklar bo‘lgan, ayniqsa, Arjun o‘yinchoqlarini birga o‘ynashni istamasdi. Vaqt o‘tishi bilan nizolar susayadi va bolalar til topishib ketadi. Hozirda ular birgalikda ahil yashashadi. Sogdiananing ta’kidlashicha, bu moslashish davri ularning oilasi uchun muhim bo‘lgan. O‘g‘illari dastlabki qiyinchiliklarni yengib, bir-biriga yaqinlashganidan xursand.

Sogdiana oilasi bilan faxrlanadi. Uning so‘zlariga ko‘ra, bolalarining garderobida turli millatlar liboslarini, jumladan, o‘zbek do‘ppilarini ham uchratish mumkin. Shuningdek, u o‘g‘illari otalari bilan tez-tez muloqot qilishlari, Hindiston va Ingushetiyaga borishlarini aytadi. Sogdiana odamlarni juda yaxshi ko‘radi — u har bir inson koinot ekanligiga ishonadi va o‘g‘illariga boshqalarga nisbatan xuddi shunday munosabatni singdirishga intiladi. “Zamin” yangiliklarini “Facebook”da kuzatib boring