20:11 / 28.12.2024

Prezident Yangi Toshkentdagi ilm va ta'lim maskanlari qurilishi bilan tanishdi (foto)

^{Foto: Prezident matbuot xizmati}
Shavkat Mirziyoev 28 dekabr kuni Yangi Toshkent shahrida qurilayotgan ob'ektlar bilan tanishdi. Jumladan, 30 ming kv.m. maydonda joylashgan Milliy kutubxonani borib koʻrdi.

- Men avval aytganimdek, bizning ikkita oʻq tomirimiz, ikkita tayanch ustunimiz bor: biri – iqtisodiyot boʻlsa, biri – ma'naviyatdir. Ma'naviy buyuk xalq – iqtisodiy tomondan ham buyuk boʻladi. Bilimli yoshlar bobolarimizga munosib keng fikrli, milliy gʻururli, etuk insonlar boʻladi. Shuning uchun yangi shahrimiz qurilishini ma'rifat maskanlaridan boshlayapmiz. Bular yuz yilga tatigulik ma'naviyat, ma'rifat, ilm oʻchogʻi boʻlishi kerak, - dedi Shavkat Mirziyoev.

Zamonaviy kutubxonada xodimlar ham shunga munosib boʻlishi, ilgʻor axborot texnologiyalari va xizmatlarni yaxshi bilishi kerakligi ta'kidlandi. Shu bois Oʻzbekiston Milliy universiteti va boshqa oʻquv yurtlarida kutubxonachilar tayyorlash sifatini oshirish vazifasi qoʻyildi. Mamlakatimizning 14 ta shahrida kutubxona filiallarini tashkil etib, hududlardagi aholining ham kitob oʻqishiga qulaylik yaratish boʻyicha koʻrsatmalar berildi.

Shaharda Toshkent davlat pedagogika universiteti hamda «Yangi Oʻzbekiston» universiteti uchun zamonaviy majmualar ham bunyod etilmoqda. Prezident ularning qurilish jarayonini koʻzdan kechirdi.

Davlat rahbari tashabbusi bilan tashkil etilgan «Yangi Oʻzbekiston» universiteti uchun yangi majmua qurilishi uch bosqichda olib boriladi. Dastlab oʻquv ob'ektlari va rektorat binosi bunyod etilishi koʻzda tutilgan.

Yakunda oʻn ming nafar talabani qamrab oladigan beshta fakultet, bir vaqtning oʻzida sakkiz ming nafar talabaga xizmat koʻrsatadigan rektorat binosi qad koʻtaradi. Kutubxona, muzey, koʻrgazma zali, multimedia xonasi, sport majmuasi, suzish havzasi tashkil etiladi.

Davlat rahbari bu majmualarning kelgusidagi ahamiyatiga toʻxtalib, oʻquv jarayonini oqilona tashkil etish muhimligini ta'kidladi.

- Bu ma'rifat maskanlari - yoshlarimizga investitsiya. Ulardagi yoʻnalishlar, dasturlar, ta'lim sifati va kasblarda Yangi Oʻzbekistonimizdagi marralar mujassam boʻlishi kerak. Bugun bilim olayotgan yoshlar kelajakda mamlakatimizni oldinga boshlaydigan, muammolarni hal etadigan «kalit», dedi prezident.