Parkentdagi fojea: bolalar halokati bo‘yicha jinoyat ishi qo‘zg‘atildi

Parkent tumanida sodir bo‘lgan mudhish fojea butun jamoatchilikni larzaga soldi. Uch nafar voyaga yetmagan bolaning suv havzasida cho‘kib ketib, hayotdan ko‘z yumish holati jamiyatda katta iztirob va qayg‘u uyg‘otdi. Bosh prokuratura ushbu voqea yuzasidan rasmiy bayonot berdi va barcha holatlar bo‘yicha aniqlik kiritdi.

Ma’lum bo‘lishicha, bolalar cho‘kib ketgan “Parkentsoy” kanalida chuqurligi taxminan 2 metrga yetadigan, 20x40 metr maydonga ega sun’iy suv havzasi mavjud bo‘lgan. Afsuski, mazkur xavfli hududda ta’qiqlovchi belgilar o‘rnatilmagan, aholi o‘rtasida xavfsizlik bo‘yicha tushuntirish ishlari yetarli darajada olib borilmagan va bu kabi sun’iy suv havzasini bartaraf etish choralari ham ko‘rilmagani aniqlandi.

Prokuratura organlari mutasaddi tashkilotlarning bee’tiborligi va vazifalarini lozim darajada bajarmagani oqibatida bu kabi qayg‘uli holat yuz berganini e’tirof etdi. Hozirda jinoyat ishi O‘zbekiston Respublikasi Jinoyat kodeksining 116-moddasi (Kasb yuzasidan o‘z vazifalarini lozim darajada bajarmaslik) va 207-moddasi (Mansabga sovuqqonlik bilan qarash) bilan qo‘zg‘atildi.

Tergovga qadar tekshirish harakatlari davom etmoqda — barcha holatlar, har bir mas’ul shaxsning roli va xizmat majburiyatlarini qanday bajargani atroflicha o‘rganiladi. Barcha zarur tergov harakatlari amalga oshirilgach, ish bo‘yicha qonuniy qaror qabul qilinadi.

Bu fojea yana bir bor jamoatchilik va mutasaddi idoralar e’tiborini suv obyektlarida xavfsizlik qoidalariga qat’iy rioya qilish, aholi orasida tushuntirish ishlarini kuchaytirish, sun’iy havzalarda ta’qiqlovchi belgilar o‘rnatish zarurligiga qaratdi. Xavfsizlik va inson hayoti — eng oliy qadriyat. Mutasaddi tashkilotlardan kelgusida bu kabi holatlarga yo‘l qo‘ymaslik bo‘yicha amaliy choralar ko‘rilishi talab etilmoqda.

Foto: Prezident matbuot xizmati “Zamin”ni Telegramʻda oʻqing!