Andijon viloyatida yer resurslari talon-toroj qilinishi va uy-joy qurilishi uchun yer ajratish atrofidagi korrupsiyaga qarshi kurashish maqsadida huquqni muhofaza qiluvchi organlar tomonidan katta miqyosli tezkor tadbir o‘tkazildi. Bu haqda Bosh prokuratura rasmiy ma’lumot berdi.
Hodisa fuqaro U.T.ning Andijon viloyati Ichki ishlar boshqarmasi Jinoyat qidiruv bo‘limi Yer resurslari talon-toroj qilinishiga qarshi kurashish bo‘linmasiga qilgan murojaati ortidan yuzaga keldi. Uning ma’lumotiga ko‘ra, Bo‘ston tumani hokimining 2019 yil 13 apreldagi qaroriga asosan “B.N.” MCHJga gidroponika texnologiyasida issiqxona qurish uchun ajratilgan 2,5 gektar yer maydonini qonunga zid ravishda turar joy toifasiga o‘zgartirishga urinishi kuzatilgan.
Tekshiruvlar davomida aniqlanishicha, fuqaro J.M. viloyat hokimligi va arxitektura boshqarmasidagi tanishlari orqali yerning maqsadli yo‘nalishini o‘zgartirib berish, ya’ni noturar yerni turar joy qurish uchun rasmiylashtirish evaziga 44 000 AQSH dollari talab qilgan. Kelishuvga muvofiq, pulning 10 000 AQSH dollarini olgan paytida J.M. ashyoviy dalillar bilan ushlangan va qonunga muvofiq chora ko‘rilgan.
Voqeaga huquqni muhofaza qiluvchi organlar va viloyat prokuraturasi hamkorligida huquqiy baho berildi. Mazkur holat yuzasidan Jinoyat kodeksining 168-moddasi 4-qismi “a” bandi va 28,211-moddasi 3-qismi “a” bandi bo‘yicha jinoyat ishi qo‘zg‘atilib, tergov ishlari boshlab yuborildi.
Mutasaddilarning ta’kidlashicha, bu kabi holatlarga qarshi kurashda jamoatchilikning faolligi va huquqni muhofaza qiluvchi organlarning hamkorlikdagi sa’y-harakatlari muhim ahamiyat kasb etadi. Mazkur ish bo‘yicha barcha aybdorlar qonun oldida javob beradi.
Zamin.uz tahririyati:
Yer resurslaridan noqonuniy foydalanish va mansabdor shaxslarning poraxo‘rlik harakatlariga nisbatan keskin chora ko‘rilishi mamlakatdagi qonun ustuvorligini yana bir bor tasdiqlamoqda. Tergov jarayonida barcha dalil va faktlar to‘liq o‘rganilib, tegishli qaror qabul qilinishi kutilmoqda.
Foto: Bosh prokuratura “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
