Angrenda 14 yoshli qizga zo‘ravonlik: 4 yigit tergov ostida

Angren shahrida yuz bergan ayanchli holat jamoatchilikda qattiq rezonans uyg‘otdi. Ijtimoiy tarmoqlarda tarqalgan xabarlarga ko‘ra, voyaga yetmagan 14 yoshli qiz 4 nafar yigit tomonidan zo‘rlangan. Bu holatga nisbatan huquqni muhofaza qiluvchi organlar va tegishli idoralar tomonidan shoshilinch choralar ko‘rilmoqda.

Bolalar ombudsmanining ma’lum qilishicha, 2025 yil 9 may kuni mazkur holat yuzasidan jinoyat ishi qo‘zg‘atilgan va hozirda dastlabki tergov harakatlari olib borilmoqda. Tergov jarayonlari Angren shahar prokuraturasi tomonidan qat’iy nazoratga olingan.

Bolalar huquqlarini himoya qilish maqsadida Bolalar ombudsmani va Ijtimoiy himoya milliy agentligi ushbu ishni alohida nazoratga olgan. Jabrlanuvchi qizning huquqiy manfaatlarini himoya qilish, uning xavfsizligini ta’minlash va psixologik tiklanishini ta’minlash maqsadida tegishli choralar ko‘rilmoqda.

Mutaxassislar bolaning ruhiy holati va salomatligini tiklash uchun doimiy ravishda psixologik maslahatlar, tibbiy yordam hamda ijtimoiy qo‘llab-quvvatlash ishlarini olib bormoqda. Rasmiy ma’lumotlarga ko‘ra, jabrlanuvchiga bronxopnevmoniya va anemiya tashxislari qo‘yilgan bo‘lib, u hozirda shifoxonada davolanmoqda.

Shuningdek, "Inson" ijtimoiy xizmatlar markazi va boshqa mutasaddi tashkilotlar jabrlanuvchi va uning yaqinlari bilan hamkorlikda ish yuritmoqda. Holat yuzasidan qo‘shimcha ma’lumotlar rasmiy kanallar orqali e’lon qilinishi kutilmoqda.

Mazkur voqea yana bir bor bolalar xavfsizligi va jamiyatda zo‘ravonlikka qarshi choralarni kuchaytirish zarurligini ko‘rsatdi. Hukumat va tegishli tashkilotlar bu borada izchil faoliyat olib bormoqda. “Zamin”ni Telegramʻda oʻqing!