Toshkent shahrida 11 yoshli qizi tok urushi oqibatida halok bo‘lgan ayol o‘z turmush o‘rtog‘ini pichoqlab o‘ldirdi. Bu haqda Bosh prokuratura matbuot xizmati ma’lum qildi.
Hodisa qachon sodir bo‘lgani ochiqlanmagan. Ma’lumotlarga ko‘ra, ayol qo‘lga olingan va unga nisbatan Jinoyat kodeksining 97-moddasi 1-qismi (Qasddan odam o‘ldirish) bo‘yicha jinoyat ishi ochilgan. Agar aybi isbotlansa, u 15 yilgacha ozodlikdan mahrum qilinishi mumkin. Hozirgi paytda tergov jarayonlari davom etmoqda.
Eslatib o‘tamiz, ayolning 11 yoshli qizi 30 may kuni Mirobod tumanidagi Qiyot massivi hovlisida tok urushi oqibatida vafot etgan edi. Bolajon ishchilar qarovsiz qoldirgan zinapoyadan chiqib, boshqa bolalarga o‘yinchoqni olib berishga harakat qilgan vaqtda fojea yuz bergan. Bu lahza kuzatuv kameralari tomonidan ham qayd etilgan.
Ona orqadan-orqa kelgan fojea ortidan, bir oy o‘tgach, aybdorlar aniqlanmagani va hudud hamon xavfli holda qolgani haqida gapirgan. Uning so‘zlariga ko‘ra, simlar hali ham bolalar maydoni yaqinida osilib turgan, shuningdek, oila hech qanday tergov ma’lumotini olmagan.
“Zamin”ni Telegramʻda oʻqing!
