O‘zbekistonda pensiya oluvchilarning soni yil sayin ortib bormoqda. Budjetdan tashqari pensiya jamg‘armasi ma’lumotlariga ko‘ra, 2025-yil 1-oktyabr holatiga mamlakatda jami 4 million 241,8 ming nafar fuqaro pensiya oladi. Bu ko‘rsatkich o‘tgan yilga nisbatan biroz oshganini bildiradi.
Pensiya oluvchilarning katta qismini yoshga doir pensiya oluvchilar tashkil etadi — ularning soni 3 million 514,1 ming nafarga teng. Shuningdek, 482,1 ming nafar fuqaro nogironlik pensiyasi, 245,6 ming nafari esa boquvchisini yo‘qotganlik pensiyasini olmoqda.
Hududlar kesimida eng ko‘p pensiya oluvchilar Farg‘ona, Samarqand va Andijon viloyatlarida qayd etilgan. Xususan, Farg‘onada 500,8 ming, Samarqandda 451,6 ming, Andijonda esa 399 ming nafar fuqaro pensiya oladi.
Aksincha, eng kam pensiya oluvchilar Sirdaryo, Navoiy va Jizzax viloyatlarida yashaydi. Sirdaryoda 108,9 ming, Navoiyda 142,1 ming va Jizzaxda 145,2 ming nafar fuqaro pensiya oluvchilar sifatida ro‘yxatga olingan.
Mutaxassislarning fikricha, aholining keksayishi va mehnat staji ortib borishi kelgusi yillarda pensiya oluvchilar sonining yanada ko‘payishiga olib keladi. Shu sababli pensiya tizimini yanada takomillashtirish va barqarorligini ta’minlash dolzarb masala bo‘lib qolmoqda.
“Zamin”ni Telegramʻda oʻqing!
