Qamchiq dovonida sodir bo‘lgan ikki yo‘l-transport hodisasi bo‘yicha Favqulodda vaziyatlar vazirligi tezkor ma’lumot berdi. Vazirlik axborot xizmatiga ko‘ra, 28-oktyabr kuni ertalab mazkur hududda ikki yuk avtomobili ishtirokida YTH qayd etilgan.
Tafsilotlarga ko‘ra, soat 06:10 da A-373 avtomobil yo‘lining Qamchiq dovoni orqali o‘tuvchi qismida «Vodiy–Toshkent» yo‘nalishida harakatlanayotgan «SHACMAN» rusumli yuk avtomobili haydovchisi boshqaruvni yo‘qotib, yo‘l chetidagi xandaqqa tushib ketgan.
Oradan bir yarim soat o‘tib, soat 07:40 da shu yo‘nalishda ketishga harakat qilgan «DAF» rusumli boshqa yuk avtomobili haydovchisi ham boshqaruvni yo‘qotgan va yo‘l o‘rtasidagi temir to‘siqqa urilgan holda to‘xtab qolgan.
Favqulodda vaziyatlar vazirligi qutqaruvchilar guruhi holat haqidagi xabarni olgach, qisqa vaqt ichida hodisa joyiga yetib borgan. Ular maxsus texnika yordamida har ikki transport vositasini xavfsiz hududga chiqarish ishlarini amalga oshirishgan.
Hodisa natijasida insonlar tan jarohati olmagani ma’lum qilindi. Yo‘lda harakat vaqtincha cheklangan bo‘lsa-da, qisqa fursat ichida tozalanib, yo‘l harakati to‘liq tiklandi.
Ma’lumot uchun, Qamchiq dovoni mamlakatning eng murakkab tog‘li yo‘l qismi hisoblanadi. U yerda havo harorati, namlik va yog‘ingarchilik sharoiti tufayli haydovchilardan yuqori diqqat va ehtiyotkorlik talab qilinadi. Shu sababli Favqulodda vaziyatlar vazirligi (FVV) va Yo‘l harakati xavfsizligi boshqarmasi (YHXB) doimo haydovchilarni dovon orqali harakatda chuqur ehtiyot bo‘lishga, texnik jihatdan to‘liq tayyor transport vositalaridan foydalanishga chaqiradi.
Qamchiqdagi bu voqea yana bir bor yo‘ldagi ehtiyotkorlik va mas’uliyatning naqadar muhim ekanini eslatib qo‘ydi.
“Zamin”ni Telegramʻda oʻqing!
