Davlat xavfsizlik xizmati hamda Ichki ishlar vazirligi xodimlari hamkorligida odam savdosiga qarshi kurashish doirasida o‘tkazilgan tezkor tadbir davomida Toshkent xalqaro aeroportida jinoiy harakatga aloqador shaxs qo‘lga olindi. Huquqni muhofaza qiluvchi organlar tomonidan amalga oshirilgan mazkur operatsiya natijasida og‘ir jinoyatning oldi olindi.
Ma’lum bo‘lishicha, poytaxtda yashovchi, 1998 yilda tug‘ilgan S.N. ikki nafar fuqaroni Tailandga olib chiqib ketish orqali ularni fohishalikka jalb qilishni rejalashtirgan. U aynan ushbu maqsadda fuqarolarni chet elga jo‘natish arafasida aeroport hududida ushlangan.
Dastlabki surishtiruv ma’lumotlariga ko‘ra, mazkur jinoiy sxema ortida hozirda Tailand hududida bo‘lib turgan, 2005 yilda tug‘ilgan F.A. turgani aniqlangan. Tergov organlari uni jinoyatni tashkil etgan shaxs sifatida ko‘rsatmoqda.
Qayd etilishicha, holat yuzasidan gumonlanuvchilarga nisbatan O‘zbekiston Respublikasi Jinoyat kodeksining 135-moddasi 2-qismi “b”, “g”, “ye”, “z” bandlari asosida jinoyat ishi qo‘zg‘atilgan. Ayni paytda barcha holatlarga huquqiy baho berish maqsadida tergov harakatlari davom etmoqda.
Mutaxassislar ta’kidlashicha, bunday tezkor tadbirlar fuqarolar xavfsizligini ta’minlash, ayniqsa, odam savdosi kabi og‘ir jinoyatlarga qarshi samarali kurashishda muhim ahamiyat kasb etadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
