Yangi yil arafasi — nafaqat bayram, balki ayrimlar uchun juda foydali mavsum. Xususan, Qorbobo obrazida chiqish qilish bu davrda yaxshi daromad keltiradigan xizmatlardan biriga aylanadi. Bayramga shoshilayotgan ota-onalar tayyor ssenariy va qahramonlar bilan kelib, bolalarga quvonch ulashishni istaydi.
Eng keng tarqalgan variant — Qorboboni Qorqizsiz chaqirish. Bu holatda dastur nisbatan soddaroq bo‘ladi, sovg‘alar esa narxga kirmaydi. Ota-onalar ularni oldindan tayyorlab, Qorboboning xaltasiga joylashtirishadi. Odatda bunday xizmat narxi taxminan 1 million so‘m atrofida baholanadi. Ammo 31-dekabr kechasiga kelib, talab keskin oshadi va narx 4–5 million so‘mgacha chiqishi mumkin.
Qorbobo va Qorqiz birgalikda chiqadigan dastur esa yanada jonli va qiziqarli o‘tadi. Ikki qahramon ishtirok etgani uchun sahnaviy harakatlar ko‘payadi, bolalar bilan muloqot faolroq bo‘ladi. Agar rollarni professional aktyorlar ijro etsa, xizmat qiymati yanada oshib, odatda 1,5 million so‘mdan boshlanadi va yuqoriroq narxlarda ham taklif qilinadi.
Eng qiziq jihati — daromad. Agar bir chiqish o‘rtacha 1–1,5 million so‘mdan baholansa, 30–31 dekabr kunlari davomida 8–10 ta buyurtmani bajarish mumkin. Shu tarzda, bor-yo‘g‘i 1–2 kun ichida 12–15 million so‘mgacha sof daromad qilish ehtimoli bor.
Xulosa qilib aytganda, Yangi yil arafasida Qorbobo bo‘lish — bayramona kayfiyat bilan birga yaxshigina mablag‘ ham keltiradigan mavsumiy ish hisoblanadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
