Davlat xavfsizlik xizmati (DXX)ning Farg‘ona viloyati bo‘yicha boshqarmasi xodimlari bojxona va ichki ishlar organlari bilan hamkorlikda o‘tkazgan tezkor tadbirlarda Tojikistondan noqonuniy olib kirilgan giyohvandlik vositalari aylanmasiga aloqador bir qator holatlar aniqlandi. Qayd etilishicha, operatsiyalar davomida Qo‘qon shahri va viloyatning boshqa hududlarida kontrabanda yo‘li bilan olib kirilgan “opiy” va “gashish”ning katta partiyalari musodara qilingan.
Avvalo, Tojikistondan kontrabanda qilingan giyohvandlik vositalarini sotish bilan shug‘ullanib kelgan, 1984 yilda tug‘ilgan fuqaroning Qo‘qon shahridagi yashash xonadoni ko‘zdan kechirildi. Tekshiruv natijasida xonadon oshxona qismidan 4 kg 572 gramm “opiy” hamda 1 kg 58 gramm “gashish” aniqlanib, belgilangan tartibda rasmiylashtirib olindi.
Shuningdek, tergovga qadar o‘tkazilgan harakatlar jarayonida unga tojikistonlik narkosavdogarlar tomonidan WhatsApp orqali yuborilgan geolokatsiya ma’lumotlari asosida, muqaddam Dang‘ara tumani hududiga yashirib ketilgan 9 kg 980 gramm “opiy” moddasi ham topilib, olib qo‘yildi.
Tadbirlar davomida yana bir jiddiy holat ochildi: Qo‘qon shahrida istiqomat qiluvchi 1969 yilda tug‘ilgan shaxs giyohvandlik vositalarini qayta ishlash va “iste’molga tayyor” holatga keltirishga xizmat qiluvchi narkolaboratoriya tashkil etgani ma’lum bo‘ldi. Uning yashash manzilidan ham 7 kg 226 gramm “opiy” moddasi olingan.
Bundan tashqari, Qo‘qon shahri hududida harakatlanayotgan 1980 yilda tug‘ilgan mahalliy fuqaro boshqaruvidagi “Lacetti” rusumli avtotransport vositasi to‘xtatilib, ko‘zdan kechirilganda, unda muqaddam 34 ming AQSH dollariga xarid qilingan 5 kg 22 gramm “opiy” moddasi borligi aniqlandi.
Tezkor tadbir keyin ham davom ettirilib, ushbu giyohvandlik moddasini sotgan 1985 yilda tug‘ilgan hamshahar fuqaro hamda uning jinoiy sherigi bo‘lgan 1985 yilda tug‘ilgan Tojikiston fuqarosi qo‘lga olindi. Qo‘shimcha tekshiruvlarda tojikistonlik fuqaroning O‘zbekiston tumanidagi xonadonidan 2 kg 362 gramm “opiy” ham musodara qilindi.
Qo‘qon shahrida qayd etilgan yana bir holatda esa “Neksiya” rusumli avtomashina to‘xtatilib, xolislar ishtirokida ko‘zdan kechirildi. Tekshiruv vaqtida yo‘lovchi sifatida ketayotgan 1992 yilda tug‘ilgan fuqaroga tegishli sumka ichida 982 gramm “gashish” borligi ma’lum bo‘ldi. Dastlabki ma’lumotlarga ko‘ra, u giyohvandlik vositasini tojikistonlik narkokurerlar tomonidan oldindan yashirib ketilgan xufiya joydan olgan.
Farg‘ona shahrida o‘tkazilgan alohida tezkor tadbirda ham navbatdagi savdo urinishi to‘xtatildi: 2000 yilda tug‘ilgan shaxs Tojikistondan olib kelingan 989 gramm “gashish”ni xaridorga 150 million so‘mga sotish paytida ashyoviy dalillar bilan ushlandi.
Olib borilgan tezkor harakatlar natijasida, umumiy hisobda taxminan 29 kg 162 gramm “opiy” va 3 kg 29 gramm “gashish” muomaladan olib qo‘yilgani qayd etilmoqda.
Hozirda barcha holatlar yuzasidan qonunbuzarlarga nisbatan Jinoyat kodeksining 246 va 273-moddalari bilan jinoyat ishlari qo‘zg‘atilib, “qamoq” ehtiyot chorasi qo‘llandi. Tergov harakatlari davom etmoqda.
Bu kabi tezkor tadbirlar bir narsani ko‘rsatadi: giyohvandlikka qarshi kurashda nazorat kuchayayotgani, jamiyat xavfsizligi uchun tahdid bo‘lgan tarmoqlar esa bosqichma-bosqich fosh etilayotgani muhim ahamiyat kasb etmoqda.
“Zamin”ni Telegramʻda oʻqing!
