Navoiy viloyatida shaharlararo yo‘nalishda harakatlangan yo‘lovchi avtobusi ishtirokida navbatdagi yo‘l-transport hodisasi yuz berdi. Haydovchi boshqaruvni yo‘qotib, qarama-qarshi yo‘lakka chiqib ketgan va oqibatda avtobus ag‘darilgan. Bu haqda podrobno.uz xabar beradi.
Viloyat Yo‘l harakati xavfsizligi boshqarmasi ma’lumotiga ko‘ra, hodisa 17-yanvar kuni soat 09:00 da (Toshkent vaqti bilan) A-379 xalqaro avtomobil yo‘lining “Navoiy – Uchquduq” yo‘nalishi, 189-kilometrida sodir bo‘lgan.
Avtohalokat natijasida ikki kishi jarohat olib, Zarafshon shahar markaziy shifoxonasiga yotqizilgan.
Mazkur holat yuzasidan Jinoyat kodeksining 266-moddasi 1-qismi (harakat xavfsizligi qoidalarini buzish) bilan jinoyat ishi qo‘zg‘atildi. Tergov harakatlari olib borilmoqda.
Eslatib o‘tamiz, 5-yanvar kuni ham Navoiy viloyatida salonida 47 nafar yo‘lovchi bo‘lgan avtobus ag‘darilgandi. O‘shanda oqibatlar og‘ir kechib, ikki kishi voqea joyida halok bo‘lgan, yana to‘qqiz kishi turli darajada tan jarohati olgandi.
“Zamin”ni Telegramʻda oʻqing!
