Ijtimoiy tarmoqlarda Toshkent shahridagi noxush holat aks etgan video keng muhokamaga sabab bo‘ldi. Kadrlarda bir yigit xorijlik fuqaroga nos chekishni majburlamoqchi bo‘lib, haqoratomuz so‘zlar ishlatadi, tahdid qiladi va urish bilan qo‘rqitadi.
Videoda yigit: «Chekasan! Hozir uraman. Senga O‘zbekiston bedarvozami? Nosni chek», deya baqirib, chet ellikni bosim ostiga olgani ko‘rinadi.
Voqea qayerda va qachon bo‘lgan?
Toshkent shahar IIBB o‘tkazgan tekshiruv natijasiga ko‘ra, ushbu hodisa 25 yanvar kuni Chilonzor tumanidagi istirohat bog‘laridan birida sodir bo‘lgan.
Rasmiy ma’lumotda qayd etilishicha, 20 yoshli M.K. chet el fuqarosiga nos (tamaki mahsuloti) chekishni taklif qilish orqali uyatli so‘zlar bilan haqorat qilgan va jamiyatda yurish-turish qoidalarini qasddan buzgan.
Qanday chora ko‘rildi?
Holat yuzasidan Chilonzor tumani IIO FMB tomonidan unga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) bilan ma’muriy bayonnoma rasmiylashtirilgan.
Ommaviy axborot vositalarida tarqalgan ma’lumotlarga ko‘ra, sud yigitga 5 kunlik ma’muriy qamoq jazosini tayinlagan.
Nega bu holat xavfli?
Bunday “hazil” degan narsa yo‘q: chet ellikka bosim qilish, haqorat qilish — mamlakat obro‘siga ham, ko‘cha madaniyatiga ham qattiq zarba. Bir odamning xunuk qilig‘i butun xalq haqida noto‘g‘ri tasavvur uyg‘otib qo‘yishi mumkin.
Xulosa oddiy: mehmonga hurmat — bu shunchaki gap emas, bu oddiy tarbiya. Toshkent — katta shahar, ko‘z-ko‘z qilinadigan yuzimiz ham shu yerda.
“Zamin”ni Telegramʻda oʻqing!
