Mamlakatimiz hududida noqonuniy aylanmaga qarshi kurash doirasida yana bir yirik holat fosh etildi. Davlat xavfsizlik xizmati tomonidan ma’lum qilinishicha, Sirdaryo daryosi bo‘yidan katta miqdordagi giyohvandlik vositalari aniqlanib, musodara qilingan.
Qayd etilishicha, Sirdaryo daryosining Beshariq tumani hududidan oqib o‘tuvchi qirg‘oq qismida noma’lum shaxslar tomonidan tashlab ketilgan 4 dona polietilen qop topilgan. Ushbu holat chegara qo‘shinlari tomonidan olib borilgan tezkor-profilaktik tadbirlar davomida aniqlangan.
Topilgan qoplar xolislar ishtirokida tekshirilganda, ularning ichidan juda katta miqdordagi noqonuniy moddalar aniqlangan. Jumladan, jami 48 o‘ramda 47 kilogrammdan ortiq “gashish”, 15 o‘ramda qariyb 8 kilogramm “opiy” giyohvandlik vositalari borligi ma’lum bo‘lgan.
Bundan tashqari, qoplar ichida dori vositalari ham topilgan — xususan, 10 mingdan ortiq “Lidaza” hamda 700 dan ziyod “Tenoksikam” preparatlari aniqlanib, belgilangan tartibda rasmiylashtirib olingan. Mutaxassislar bu mahsulotlar qo‘shni davlatdan noqonuniy yo‘l bilan olib o‘tilgan bo‘lishi mumkinligini ta’kidlashmoqda.
Mazkur holat yuzasidan Jinoyat kodeksining kontrabanda bilan bog‘liq moddasi asosida jinoyat ishi qo‘zg‘atilgan. Hozirda ushbu noqonuniy yuk ortida turgan shaxslarni aniqlash va qo‘lga olish bo‘yicha tezkor-qidiruv tadbirlari davom ettirilmoqda.
Huquq-tartibot organlari fuqarolarni hushyor bo‘lishga, shubhali holatlar haqida tegishli idoralarga zudlik bilan xabar berishga chaqirmoqda.
“Zamin”ni Telegramʻda oʻqing!
