Timur Musin biznesini sotmoqda: sabablar ochiqlandi

Toshkentdagi mashhur restoran va dam olish maskanlari egasi, Caravan Group asoschisi Timur Musin oʻz biznesining bir qismini sotuvga qoʻydi. Bu haqdagi eʼlonlar OLX platformasida paydo boʻlib, jamoatchilik eʼtiborini tortdi.

Maʼlum boʻlishicha, 13 aprel kuni poytaxtda joylashgan yirik “Palov muzeyi” restorani sotuvga chiqarilgan. Besh qavatdan iborat ushbu majmua 5800 kvadrat metr maydonni egallab, Solor kanali boʻyidagi 20 sotix hududda joylashgan. Obektning umumiy qiymati 150 milliard soʻm deb baholangan. Shu bilan birga, uni qismlarga boʻlib — 1100 kvadrat metrdan boshlab sotib olish imkoniyati ham taklif etilmoqda.

Bundan tashqari, mashhur Caravan restorani ham sotuvda. U 7 sotix yer maydonida joylashgan boʻlib, umumiy maydoni 1800 kvadrat metrni tashkil qiladi. Restoran qish faslida 250 nafargacha, yozda esa 490 nafargacha mehmon qabul qilish imkoniga ega. Uning narxi 45 milliard soʻm deb belgilangan.

Boʻstonliq tumanida joylashgan Cinara’s etnografik majmuasi ham sotuv roʻyxatiga kiritilgan. U 80 sotix hududni egallab, binolarining umumiy maydoni 1400 kvadrat metrni tashkil etadi. Ushbu obekt 99 milliard soʻmga baholanmoqda.

Tadbirkorning aytishicha, bunday qaror qabul qilinishiga sud jarayonlari va investitsiyalarni yoʻqotish xavfi sabab boʻlgan. U amalga oshirmoqchi boʻlgan yirik etnografik loyiha turli maʼmuriy toʻsiqlar tufayli toʻxtab qolganini taʼkidladi.

Timur Musinning maʼlum qilishicha, mehmonxona va akvaparkni oʻz ichiga olgan etnografik qishloq qurish rejasi murakkab investitsiya muhiti sabab nomaʼlum muddatga qoldirilgan. Ushbu loyihaga katta mehnat va moliyaviy resurslar sarflanganiga qaramay, kutilgan qoʻllab-quvvatlov boʻlmagan.

Maʼlumotlarga koʻra, muammolarning asosiy qismi yer masalalari bilan bogʻliq. Jumladan, Boʻstonliq tumanidagi avtomobil yoʻlini rekonstruktsiya qilish jarayonida kompaniyaga tegishli yer maydoni qisman olib qoʻyilgan. Sud tomonidan kompensatsiya toʻlash haqida qaror chiqarilgan boʻlsa-da, u bir necha bor bekor qilingan va ish qayta koʻrib chiqilmoqda.

Shuningdek, avval tadbirkordan 4 gektar yer olib qoʻyilib, oʻrniga noqulay hudud berilgani ham holatni murakkablashtirgan. Keyinchalik esa kadastr hujjatlari boʻyicha nizolar kelib chiqqan.

Hozirgi vaziyatda kompaniya bir nechta xorijiy hamkorlar bilan ishni toʻxtatgan, bank hisoblaridagi katta miqdordagi investitsiyalar esa muzlatilgan. Sud ishlari esa hozirgacha turli instantsiyalarda davom etmoqda.

Shu tariqa, yirik tadbirkor oʻz biznesining bir qismini sotish orqali moliyaviy bosimni kamaytirishga harakat qilmoqda.