Turkiyada yuzaga kelgan mojaro atrofida yangi bayonotlar berilmoqda. Avvalroq 56 yoshli turkiyalik erkak o‘zbekistonlik 36 yoshli ayol uni 20 ming dollarga aldaganini da’vo qilgan edi. Endi esa ayol bu ayblovlarni qat’iyan rad etmoqda. Bu haqda u “ATV” telekanaliga bergan intervyusida ma’lum qildi.
Uning aytishicha, erkak pullarni o‘z xohishi bilan yuborgan. Ayol bir necha bor “menga pul kerak emas” deb ogohlantirganiga qaramay, u turli miqdorlarda mablag‘ o‘tkazgan. Keyinchalik esa shu pullarni qism-qism qilib qaytarishni talab qilgan.
Ayolning so‘zlariga ko‘ra, ular ilk bor taksida tanishgan. Boshida o‘zaro muloqot yaxshi kechgan va hatto u erkakka nisbatan iliq hislar ham tuygan. Ammo vaqt o‘tib, erkakning qo‘pol muomalasi, ayniqsa bolalariga nisbatan haqoratli gaplari sabab aloqani uzgan.
Shuningdek, ayol erkak uni tungi ko‘ngilochar joylarda ishlashga undaganini ma’lum qildi. Hatto bu borada tanishlari orqali ish topib berishga harakat qilgan. Biroq u bu takliflarni rad etganini ta’kidladi.
Yana bir jiddiy ayblovga ko‘ra, erkak ayolni ijtimoiy tarmoqlar orqali boy insonlarni aldashga undagan. Ayol esa bunday takliflarga rozi bo‘lmaganini va halol mehnat qilishni afzal ko‘rishini aytgan.
Hozirda ayol Turkiyada oddiy ishlarda mehnat qilib, mustaqil hayot kechirayotganini bildirdi. Uning ta’kidlashicha, erkak bilan bog‘liq janjallar sabab hatto vaqtincha uysiz qolgan holatlari ham bo‘lgan.
Ayol so‘nggi so‘zlarida yana bir bor hech qachon pul talab qilmaganini, barcha mablag‘lar erkakning shaxsiy tashabbusi bilan yuborilganini ta’kidladi.
“Zamin”ni Telegramʻda oʻqing!
