Foto: Telegram / Saida Mirziyoyeva
Prezident Administratsiyasi rahbari Saida Mirziyoyeva 27 aprel kuni Xorazm viloyatiga tashrif buyurib, hududda amalga oshirilayotgan ijtimoiy rivojlantirish ishlari bilan tanishdi. U oʻz bayonotida prezident qarorlari ijrosi doirasida amaliy ishlar olib borilayotganini taʼkidladi.
Maʼlum qilinishicha, qisqa vaqt ichida yuzdan ortiq dolzarb muammolarga yechim topilgan. Biroq, masʼullar ishni shunchaki raqamlar bilan emas, balki har bir obyektni alohida, puxta va oxirigacha oʻrganish orqali davom ettirishni maqsad qilgan.
Tashrif davomida Xonqa tumanidagi holatga alohida eʼtibor qaratildi. Jumladan, taʼmirga jiddiy muhtoj boʻlgan 2-sonli maktab va uzoq vaqt qarovsiz qolib, avariya holatiga kelib qolgan 49-sonli maktabgacha taʼlim muassasasi koʻzdan kechirildi. Bu obyektlarda yaqin vaqtda amaliy ishlar boshlanishi kutilmoqda.
Shuningdek, Urganch shahrida joylashgan Davlat xoreografiya akademiyasi filiali faoliyati ham oʻrganildi. Hozirda oʻquv auditoriyalari va oʻquvchilar uchun moʻljallangan maktab-internat bir binoda joylashgani maʼlum boʻldi. Kelgusida esa qoʻshimcha inshoot barpo etilib, har bir muassasa alohida va zamonaviy shart-sharoitlarga ega boʻlishi rejalashtirilgan.
«Yuzdan ortiq muammoli masala qisqa fursatda oʻz yechimini topdi. Biroq obyektlarning soni va koʻlamidan qatʼi nazar, jamoamiz ularning barchasini bitta-bitta, sinchiklab va oxirigacha oʻrganib chiqadi. Xonqa tumanida mukammal taʼmirga juda muhtoj boʻlgan 2-maktabni, shuningdek, qarovsiz tashlab qoʻyilgan va avariya holatiga kelib qolgan 49-maktabgacha taʼlim muassasasini koʻzdan kechirdik. Davlat xoreografiya akademiyasining Urganch filialida ham boʻldik. Hozirda oʻquv auditoriyalari hamda akademiyaning boʻlajak tarbiyalanuvchilari maktab-internati bitta binoda joylashgan. Kelgusida qoʻshimcha bino qurilib, har bir muassasa oʻzining alohida, toʻlaqonli sharoitiga ega boʻladi», deb yozdi Saida Mirziyoyeva.
Qisqacha aytganda, ish jarayoni faqat tekshirish bilan cheklanmayapti — natijaga qaratilgan harakat boshlangan. Endi asosiysi, bu oʻzgarishlar tez va sifatli amalga oshishi.
“Zamin”ni Telegramʻda oʻqing!
