Navoiy viloyatida o‘quvchilar ishtirokida sodir bo‘lgan yo‘l-transport hodisasi ayanchli oqibat bilan yakunlandi. Bu haqda Yo‘l harakati xavfsizligi boshqarmasi ma’lum qildi.
Ma’lumotlarga ko‘ra, hodisa Karmana tumanining Malik mahallasi hududida 22 aprel kuni kechki soat 21:00 atrofida yuz bergan. Qayd etilishicha, “Cobalt” rusumli yengil avtomobil rulda bo‘lgan maktab o‘quvchisi tomonidan boshqarilgan.
Avtomobil ichida 22-umumta’lim maktabida tahsil oluvchi ikki nafar o‘quvchi bo‘lgan. Harakat davomida haydovchi transport vositasi ustidan nazoratni yo‘qotgan va natijada mashina yo‘ldan chiqib ketgan.
Yo‘l-transport hodisasi oqibatida 9-sinf o‘quvchisi og‘ir jarohatlar olib, shifoxonada vafot etgan. 11-sinf o‘quvchisi esa turli darajada tan jarohatlari bilan tibbiyot muassasasiga yotqizilgan.
Mazkur holat bo‘yicha tegishli idoralar tomonidan tergov-surishtiruv ishlari olib borilmoqda. Mutaxassislar voyaga yetmagan shaxslarning transport vositasini boshqarishi qanday jiddiy xavf-xatarlarga olib kelishi mumkinligini yana bir bor eslatmoqda.
“Zamin”ni Telegramʻda oʻqing!
