O‘zbekistonda tibbiyot sohasini modernizatsiya qilish va xususiy sektor imkoniyatlarini kengaytirishga qaratilgan yana bir muhim qadam tashlandi. Prezident tomonidan qabul qilingan yangi farmonga muvofiq, endilikda akkreditatsiyadan o‘tgan nodavlat tibbiyot muassasalariga inson a’zolari va to‘qimalarini transplantatsiya qilish amaliyoti bilan shug‘ullanishga rasman ruxsat beriladi.
Hujjatda belgilanishicha, mazkur tartib 2027 yil 1 maydan amalga kiritiladi. Biroq bu huquq barcha xususiy klinikalarga emas, balki milliy yoki xalqaro akkreditatsiya talablaridan muvaffaqiyatli o‘tgan tibbiyot muassasalariga beriladi.
Mutaxassislar fikricha, ushbu qaror mamlakatda yuqori texnologiyali tibbiy xizmatlar qamrovini kengaytirish, bemorlar uchun qo‘shimcha imkoniyat yaratish va raqobat muhitini kuchaytirishga xizmat qiladi.
Shu bilan birga, farmonda transplantatsiya sohasiga oid nazorat choralari ham qat’iy belgilangan. Qayd etilishicha, nodavlat tibbiyot tashkilotlari ushbu faoliyatni amalga oshirishda amaldagi qonunchilik talablariga to‘liq rioya qilishi shart bo‘ladi.
Ayniqsa, inson a’zolari va to‘qimalari bilan bog‘liq amaliyotlar yuqori xavfli yo‘nalish sifatida baholanadi. Shu sababli xususiy klinikalar faoliyati “xavfni tahlil qilish” tizimi orqali doimiy monitoring qilib boriladi.
Yangi tartibga muvofiq, transplantatsiya qilingan bemorlar hamda donorlar haqidagi ma’lumotlar Sog‘liqni saqlash vazirligiga muntazam ravishda taqdim etilishi shart. Bu esa sohada shaffoflik va xavfsizlikni ta’minlashga qaratilgan muhim mexanizm sifatida ko‘rilmoqda.
Prezident farmonida tibbiyot infratuzilmasini rivojlantirishga oid qator yangiliklar ham nazarda tutilgan. Xususan, 2027 yil 1 yanvardan Samarqand viloyatida tajriba-sinov tariqasida birlamchi tibbiy-sanitariya muassasalarini qurish va rekonstruksiya qilishning yangi modeli joriy etiladi.
Ushbu tizimga ko‘ra, tadbirkorlar tibbiyot obyektlaridagi qurilish va rekonstruksiya ishlarini dastlab o‘z mablag‘lari hisobidan amalga oshiradi. Keyinchalik ishlar belgilangan tartibda qabul qilingach, sarflangan mablag‘lar tadbirkorlarga qaytarib beriladi.
Kuzatuvchilar fikricha, bu kabi islohotlar xususiy sektorni tibbiyotga yanada faol jalb qilish, zamonaviy klinikalar sonini ko‘paytirish va aholi uchun tibbiy xizmat sifatini yaxshilashga xizmat qilishi mumkin.
“Zamin”ni Telegramʻda oʻqing!
