Toshkent shahrida tungi paytda noodatiy va xavfli holat yuz berdi. 8 mayga o‘tar kechasi 25 yoshli yigit poytaxt ko‘chalaridan birida yarim yalang‘och holda yo‘lning qatnov qismiga chiqib, avtomobillar harakatiga jiddiy xalal berdi.
Poytaxt Ichki ishlar bosh boshqarmasi ma’lumotiga ko‘ra, hodisa taxminan soat 02:35 atrofida Olmazor tumanidagi TXAY ko‘chasida sodir bo‘lgan. 2001 yilda tug‘ilgan S.O. mast holatda bo‘lib, jamoat joyida o‘zini nazorat qilmagan holda yo‘l o‘rtasiga chiqqan.
Qayd etilishicha, u jamiyatda qabul qilingan xulq-atvor qoidalarini mensimasdan, transport vositalarining erkin harakatlanishiga to‘sqinlik qilgan. Natijada haydovchilar uchun xavfli vaziyat yuzaga kelgan.
Mazkur holat yuzasidan huquq-tartibot organlari tomonidan tezkor choralar ko‘rilib, yigitga nisbatan Ma’muriy javobgarlik to‘g‘risidagi kodeksning 183-moddasi, ya’ni mayda bezorilik alomatlari bilan ma’muriy bayonnoma rasmiylashtirildi.
To‘plangan materiallar qonuniy tartibda ko‘rib chiqish uchun jinoyat ishlari bo‘yicha tuman sudiga yuborilgan. Holat yuzasidan yakuniy qaror sud tomonidan qabul qilinadi.
Mutaxassislar bunday holatlar nafaqat jamoat tartibini buzishini, balki yo‘l harakati xavfsizligiga ham jiddiy tahdid tug‘dirishini ta’kidlamoqda.
“Zamin”ni Telegramʻda oʻqing!
