Sirdaryoda harom o‘lgan mol go‘shtini sotgan shaxslar qo‘lga olindi

5 fevral kuni Mirzaobod tumanida yashovchi Sadriddin Alibekov dalada zovurga tushib ketib, o‘lgan qoramolini qassobchilik bilan shug‘ullanuvchi R. Elibayev yordamida so‘ydirib, uyiga olib kelgan. Bu haqda «Daryo»ga Sirdaryo viloyati IIB matbuot xizmati ma’lum qildi.

S. Alibekovning iste’molga yaroqsiz, arzon narxli mol go‘shti borligidan xabar topgan gulistonlik S. Saibov go‘shtni sotib olish taklifini aytib, 6 fevral kuni taxminan 100 kilogramm go‘sht mahsulotlarini 700 ming so‘m evaziga sotib olgan.

S. Saibov go‘shtni uyiga olib kelganidan so‘ng shu kuning o‘zida 39 kilogrammini qiyma go‘sht savdosi bilan shug‘ulanuvchi A. Bakiyevga 28 ming so‘mdan sotgan.

Bundan tashqari, shu kuning o‘zida iste’molga yaroqsiz 11 kilogramm go‘shtni Guliston shahar Bahor mahallasidagi choyxonalardan biriga borib, choyxonaning ish yurituvchisi Badriddin Ergashevga uning yaroqsiz ekanligini aytmasdan 27 ming so‘mdan sotgan.

Olib borilgan tezkor tadbir davomida 6 fevral kuni A. Bakiyevning go‘sht qiymalash xonasidagi muzlatgichda 39 kilogramm mol go‘shti, S. Saibovning uyi omborxonasida 24 kilogramm go‘shtdan ajratilgan suyak va omborxonadagi muzlatgichda 42 kilogramm go‘sht mahsulotlari hamda B. Ergashevning ish yurituvidagi choyxonani ichida joylashgan muzlatgichidan 11 kilogramm go‘sht ashyoviy dalil sifatida olingan.

Holat yuzasidan S. Soibov, A. Bakiyev, B. Ergashevlarga nisbatan JKning 186-moddasi 1-qismi jinoyat ishi qo‘zg‘atilib, tergov harakatlari olib borilmoqda.

Ko‘rsatib o‘tilgan fuqarolarning ism va shariflari o‘zgartirilib yozilgan. “Zamin” yangiliklarini “Odnoklassniki”da kuzatib boring